Alcover niawhag sa pag-develop sa Sitio Manyaptap Lake

CEBU, Philippines — Giaprobahan sa Cebu City Council ang resolusyon nga nag-awhag sa Cebu City Agriculture (CAD) ug Cebu City Tourism Office nga tun-an ang posibilidad nga ma-develop ang Sitio Manyaptap Lake sa Barangay Mabini, Dakbayan sa Sugbo isip tinubdan sa tubig sa agrikultura ug isip tourism site.

Giaprobahan kini subay sa privilege speech ni Konsehal Pastor “Jun” Alcover, chairman sa committee on agriculture niadtong Miyerkules atol sa regular session.

Sa iyang privilege speech, si Alcover nagkanayon nga duha na ka semana ang nakalabay dihang nakabisita siya sa nahisgutang lugar.

Matud niya, niadtong adlawa pa lang nila nahibaw-an nga adunay lawa diha sa maong sitio.

“Matud pa ni Kapitan Richard Adolfo, dugay na kining maong lawa diha. Ang tinubdan niini kay tubod. Tuod gani, gihimo kining tagoanan sa mga hapon panahon sa ikaduhang gubat sa kalibutan”, padayag ni Alcover.

Si Alcover nagkanayon nga gibana-bana sa barangay kapitan nga usa ka kilometro ang gitas-on sa maong lawa.

Ug ang lawa wala gyud nakasinati sa pagkahubas sa tubig niini bisan pa sa dili maayong epekto sa El Niño.

Ang maong lawa posibleng mahimong tinubdan sa tubig aron makatabang sa panginahanglanon sa tubig sa mga mag-uuma sa mga bukirang barangay sa siyudad.

Subay niini, giduso ni Alcover ang motion nga maghangyo sa Cebu City Agriculture Department, Cebu City Tourism Office, ug uban departamento ug buhatan sa kagamhanan sa siyudad nga tun-an ang posibilidad nga ma-develop ang Sitio Manyaptap Lake isip tinubdan sa tubig sa agrikultura o tourism site. — /BDB (BANAT NEWS)