PRO-7 mosusi kun dunay mga polis nalambigit sa pag-ransack

CEBU, Philippines — Ang Police Regional Office-7 nisusi kun dunay polis o mga polis ang nalambigit sa matud pa pagpang-ransack sa duha ka mga balay ug gipangkawatan kini diha sa Sitio Himongbongan, Barangay Taloot, Lungsod sa Argao niadtong Abril 16, 2024.

Si Police Lieutenant Colonel Gerard Ace Pelare, tigpamaba sa PRO-7 miingon nga gimando ni  Police Regional Director Brigadier General Anthony Aberin paghimo og imbestigasyon bahin sa maong hitabo ug ipatan-aw kun dunay mga polis nga nalambigit niini.

Niadtong Abril 16, gi-ransack sa dili momenus napulo ka armadong tawo nga nagtaptap sa ilang mga nawo ang duha ka mga balay ug gipangkuha ang mga motorsiklo, multicab ug dakong kantidad sa salapi gikan sa mga namuyo didto. Ang mga armadong lalaki gikatahong nagpaila nga mga sakop sila sa Philippine Drug Enforcement Agency (PDEA). Ang PDEA-7 kusganong mihimakak nga duna silay operasyon sa maong lugar anang adlawa.

Ang PDEA sa ilang bahin una nang miklaro nga wala sila’y operasyon nga gihimo anang adlaw ug gikondenar nila ang maong binuhata nga naghatag og kasamok sa mga residente sa naasoy nga lugar.  Nakig-alayon na sila sa Cebu Police Provincial Office (CPPO) labot niini.

Ang Regional Investigation and Detective Management Division (RIDMD) naghimo na og mas lawom nga imbestigasyon ilabi na kun dunay polis nga nalambigit niini.  Matud pa ni Pelare dunay kabutangan ang mga polis kun sila maoy nagbuhat niini. IBM BANAT NEWS