Walo ka lungsod nakadawat og tabang pinansyal gikan sa Kapitolyo

CEBU, Philippines — Laing hugna sa mga lokal nga kagamhanan sa Probinsiya sa Sugbo ang nakadawat og tabang pinansyal sa Kapitolyo.

Atol sa gipahigayon nga caravan of Provincial Government services didto sa Dumanjug, ang maong lungsod uban sa lungsod sa Ronda, Alcantara, Moalboal, Badian, Malabuyoc ug Ginatilan sa ikapitong distrito nakadawat og sumatotal P76 milyones nga tabang pinansyal gikan sa Probinsya.

Ang Dumanjug nakadawat og P9.4 million, ang Ronda ug Alcantara tag P9.5 million; Moalboal P9 million; Badian P10.5 million; Alegria P9.5 million; Malabuyoc P9.4 million ug Ginatilan nakadawat og P9.2 million.

Si gobernador Gwendolyn Garcia uban ni bokal Cesar Baricuatro, maoy nitunol sa cheke ngadto sa mga mayor, bise mayor, konsehal ug kapitan nga maoy nirepresentar sa ilang tagsa tagsa ka LGU.

Ang lokal nga kagamhanan sa Probinsya sa Sugbo kanunay kini maggahin og pundo alang sa mga LGUs sa lalawigan aron adunay magamit sa nagkadaiyang proyekto sa imprastraktura nga gustong ipatuman sa lokal nga kagamhanan sa ilang mga lugar.

Ang maong tabang pinansyal nagsilbi sab nga insentibo sa Kapitolyo ngadto sa mga LGUs kansang mga Mayor o opisyal sa lungsod ug siyudad nga motambong sa mga kalihokan sa Kapitolyo kon diin ang maong insentibo madawat atol sa ipahigayon nga caravan of services sa Probinsya matag quarter sa tuig. (BANAT NEWS)