Pagpalapad sa karsada sa habagatan gipahunong

CEBU, Philippines — Gimandoan ni gobernador Gwendolyn Garcia ang Department of Public Works and Highways–Cebu 2nd district office ug ang kontraktor niini nga ihunong ang tanang proyekto sa pagpalapad sa dalan sa habagatang Sugbo ilabi na sa lungsod sa San Fernando.

Ang gobernador mihimo sa maong kamandoan human nakaobserbar ug makasinate sa grabeng kahuot sa dagan sa trapiko sa maong dapit.

Si Garcia mipahunong usa sa maong trabaho hangtod nga walay aksyon nga himoon aron mawagtang ang pipila ka mga struktura sama sa poste nga nakababag sa proyekto.

Atol sa tigom sa gobernador uban sa mga opisyal sa DPWH Cebu second district gipangulohan ni District Engineer Leslie Anthony Molina niadtong Pebrero 26 sa Kapitolyo, si Garcia nisaysay nga sa iyang kanunay nga pagbyahe sa Probinsya iyang nabantayan ang kagrabe sa trapiko sa dalan sa habagatang tungod sa mga proyekto sa pagpalapad sa dalan sa DPWH.

Matod ni Garcia aduna mga gitrabaho nga dalan kon diin aduna pay mga poste nga wala pa matangtang ug kini delikado sa mga molabay.

Si Garcia nagkanayon nga kinahanglan adunay klaro nga traffic plan sa ilang pagpatuman og mga proyekto sa dalan aron dili kini makadala og hasol sa mga motorista.

Plano sa gobernador nga makigtagbo sa mga utility firms aron mapaspasan ang pagtangtang sa mga poste nga wala pa makuha sa mga dalan kon asa ipatuman sa DPWH ang road widening projects.

Sa laing bahin giayo na ang guba nga steel bridge sa Barangay Campo 4, Dakbayan sa Talisay.

Gipahibawo ni kapitan Rowena Edar Briones nga natagad na gyud sa Department of Public Works and Highways (DPWH) ang ilang dugay na nga gihangyo.

Matud pa ni Briones nga giwelding na sa tinugyanan sa DPWH ang guba nga portion sa taytayan nga giabagan usab sa mga sakop sa City of Talisay-Traffic Operation Development Authority (CT-TODA).

Nagtuo si Briones nga nakatabang kanila mao ang pagpahibawo diha sa social media sa kahimtang sa ilang taytayan nga delikado na nga agi-an sa mga motorista. — MEL BANAT NEWS