Proposal bahin sa Charter day bonus wa pa madawat sa konseho
CEBU, Philippines — Duha ka adlaw sa di pa ang kasaulogan Charter Day, wa pa’y nadawat nga proposal ang Cebu City Council labot sa bonus sa mga empleyado sa Cebu City hall.
Nagkanayon si Vice Mayor Raymond Alvin Garcia sa usa ka interview, nga wa pa’y nadawat nga proposal ang konseho gikan sa executive department sa Supplemental Budget 1 nga naglangkob sa Charter Day bonus.
“But as I have found out nga ilahang gi propose nga Charter Day bonus diri sa Cebu City council is P25,000,” matod ni Garcia.
Bisan pa man niini, dugang ni Garcia nga wa pa sila nahibawo kung pila ang bonus sa mga Job Order (JO) employees ug kun aduna ba sila’y madawat.
Matod ni Garcia, posibleng di mahatag ang bonus sa susamang adlaw atol sa Charter Day, tungod kay wa pa sab mahisgotan sa konseho ang approval sa budget.
“Sigurado gyud ta nga mahuman nalang ang Charter Day celebration which is 22, which is tonight and then our Charter Day is 24 di pa gyud na mahatag, so I am expecting to receive it next Wednesday,” matod ni Garcia.
Dugang niya, posibleng dugang nga hinungdan sa pagkalangay sa paghatag sa proposal nga budget mao ang ubang items lakip nga anaa sa supplemental budget alang sa Charter Day bonus.
Giklaro sab ni Garcia nga lakip sa proseso ang pag approve sa Annual Investment Plan (AIP) nga kinahanglan lingkoran uban sa Cebu City Development Councilors (CCDC).
“Mao na nga ilang i approve ang AIP, then once ma approve ang AIP, they will link their supplemental budget 1 with the AIP,” sigon ni Garcia.
Gilaoman nga malakip sa hisgotanan sa konseho ang proposal sa supplemental budget 1 karong Miyerkules tungod na approve na ang AIP.
Giklaro ni Garcia nga bisan sa nalangay nga pag approve sa Charter Day bonus, siguradong madawat ra kini sa mga kawani. — MEL BANAT NEWS
- Latest
