12 ka Barangay Birthing Centers ang gi-accredit sa Philhealth
CEBU, Philippines — Dili mominos sa 12 ka mga barangay Birthing Centers sa Cebu City ang gi accredit na sa Philippine Health Insurance Corporation kun PhilHealth.
Kini ang gibutyag ni Dr. Daisy Villa, ang pangulo sa Cebu City Health Department.
Ang dose ka mga barangay nga adunay Birthing Centers naglangkob sa Mabolo, Talamban, Guadalupe, Carreta, Inayawan, Pasil, Quiot, Cambinocot, Lahug, Tejero, Pahina San Nicolas ug Sudlon.
Sumala pa ni Villa, kung ma accredit sa PhilHealth moabaga kini sa allowable cost para sa maternity ug birthing services sa maong birthing centers, hinungdan maoy ilang tinguha nga ma accredit usab ang uban nga mga center.
Gitug-an ni Villa, ilahang tan-awon ang mga lugar tungod kay kinahanglan man ang dako nga space una kini sila ipa accredit.
Ang pagpahimutang sa birthing centers sa kabarangayan natigayon human sa nilabay nga COVID-19 pandemic, diin daghan nga mga mabdos niadtong panahona ang wala madawat sa tambalanan tungod sa mga medical emergency.
Gipadayag ni Villa, mas maminosan ang pasyente sa mga pampublikong tambalanan kung ang mga barangay health center makaatiman na sa mga mabdos nga kababayen-an. (BANAT NEWS)
- Latest
