PDL niambak patay gikan sa roof deck sa CCJ

CEBU, Philippines — Naghimo na og imbestigasyon ang Unit Intelligence and Investigation Team sa Cebu City Jail male dormitory aron masuta ang hinungdan sa paglayat patay sa 25-anyos nga Person Deprived of Liberty(PDL) diha sa roof deck sa pasilidad.

Matud ni Jail Officer 3 Blanche Aliño, tigpamaba sa CCJ male dormitory nga wala pa napamatud-an sa imbestigasyon kon aduna kini gitugon o adunay gipakitang lihok nga nag-indicate nga aduna kini planong molayat.

Niadtong Martes sa alas 4:00 sa hapon ang maong PDL niambak gikan sa roof deck diin gipahigayon ang mga religious activities sa pasilidad.

Ang maong PDL nitugpa diha sa gawas sa pasilidad ug dali kining gidala ngadto sa Cebu City Medical Center(CCMC) apan pagka-alas 6:10 sa gabii sa samang adlaw nakabsan kini sa iyang kinabuhi diha sa tambalanan.

Nasayran nga ang mga PDL nga nagpahigayon og praise and worship services sa roof deck nibitad pa sa namatay nga PDL dihang ilaha kining nakit-an nga nikatkat sa makeshift barrier nga gihimo gumikan kay padayon pa ang construction sa lugar apan wala natabang gumikan kay nakasaka na kini ug nakaadto na sa pikas nga habig ug niambak.

Ang maong PDL nasulod sa CCJ male dormitory niadtong Pebrero 11, 2020 gumikan sa kasong kalapasan Section 5 sa Republic Act 9165 kun “Comprehensive Dangerous Drugs Act og 2002”.

Si Aliño nagkanayon nga ang Bureau of Jail Management and Penology adunay welfare and development programs alang sa mga PDL sama sa education program, sports activities, health services ug spiritual programs aron makatabang sa mental health sa mga PDL nga anaa sa pasilidad.

Human sa hitabo wala una gipagamit ang roof deck tungod kay ang mga engineer sa CCJ male dormitory nitrabaho sa roof deck aron dili na masubli pa ang insidente.

Sa pagkakaron ang CCJ male dormitory adunay kapin sa 5,000 mil ka PDL. (BANAT NEWS)