River-widening nahunong kay wa pay pundo — DPWH

CEBU, Philippines — Ang wala pa naaprobahan nga pundo ug ang problema sa pagpabalhin sa mga illegal settlers mao ang nag-unang rason nganong nahunong ang proyekto sa Department of Public Works and Highways (DPWH)-7 nga mao ang river-widening projects niini sa Dakbayan sa Sugbo.

Kini ang katin-awan nga gipadangat ni June Dela Cruz, pangulo sa DPWH-7 project maintenance division segun sa tahu sa Public Information Office sa siyudad. Lakip sa mga proyekto mao ang pagpalapad sa Tejero Creek ug sa Tagunol River.

“We have also struggled in the relocation sa mga illegal settlers in the area sab kay dili mi maka-proceed without providing a relocation,” suma pa ni Dela Cruz.

Natuki ang maong katin-awan atol sa tigom sa Task Force Gubat sa Baha sa niaging adlaw.

Matud pa ni Dela Cruz nga kinahanglang hunongon sa ilang buhatan ang pagpatuman sa duha ka proyekto human wala maaprobahi ang ilang gipangayo nga pundo alang sa “right of way” (ROW).

Dugang niya nga ang pundo gituyo isip bayad sa mga tag-iya sa pribadong lote nga apektado sa pagpalapad sa sapa.

“Wala man na-approve among budget maong we have to temporarily pause the operation,”matud pa ni Dela Cruz. Kalabot sa Tagunol River, si Dela Cruz miingon nga duna kini nagpadayon nga kaso sa korte nga nag-aghat sa DPWH sa temporaryong pagpahunong sa proyekto.

Ang maong pagpalapad sa sapa kabahin sa proyekto niadtong 2017 nga giaprobahan sa departamento nga comprehensive drainage masterplan.

Samtang si kanhi Environment Secretary ug karon pangu sa Taskforce Gubat sa Baha, Roy Cimatu nitataw nga pagtinabangay ang gikinahanglan karong panahona ilabi na nga nasuta na ang ugat sa problema. (BANATNEWS)