Lumba sa dagan, langoy ug biseklita himoon sa Talisay

CEBU, Philippines — Dunay mga karsada sa dakbayan sa Talisay ang sirad-an karong buntag alang sa ipahigayon nga lumba sa dagan, langoy ug biseklita nga salmotan sa mokabat sa 300 ka mga atleta.

Ang mga motorista giawhag sa paglikay sa mga dalan diha sa barangay Pooc, barangay Biasong, sa Cebu South Coastal Road sa barangay Lawaan nonot sa pagtak-op sa karsada nonot sa kalihukan.

Si Jonathan Tumulak, City of Talisay Traffic Operations and Development Authority (CT-TODA) chief, miingon nga ang duha ka matang sa lumba anha himoon sa nahisgutang dapit.

Sagol na sa hamtong ug kabataan nga atleta ang maglumba niini sugod sa alas 6 sa buntag hangtud sa alas 11 sa buntag.

Sa barangay Pooc ug barangay Biasong, sirad-an ang karsada sa pagkabuntag alang sa rota sa Run-Swim-Run race.

Samtang ang Cebu South Coastal Road, northbound lane, maoy gamiton nga bike trail alang sa bike race, ug sirad-an kini sugod sa alas sayes sa buntag hangtud sa alas dose sa udto.

Usa lang ka lane ang magamit sa south coastal road alang sa mga sakyanan nga paingon sa habagatan ug amihanan. MEL (BANATNEWS)