Catalan: OBO moisyu og permit subay sa standard

CEBU, Philippines — Daghang lakang ang gihimo sa Office of the Building Officials (OBO) sa Cebu City Hall aron ang mga building dili dali nga maapektohan sa bisan unsang katalagman sama sa kusog nga linog.

Matud ni Architect Florante Catalan sa OBO nga sa dili pa matindog ang building kinahanglan una nga mokuha og building permit ug sa pag-apply og building permits gisusi na nila ang structural plans sa building nga pinirmahan sa structural engineers o civil engineers base sa National Structural Code of the Philippines diin ilahang i-evaluate kon pasado ba sa minimum standards.

Si Catanan nagkanayon nga gipatuman nila ang anaa sa balaod gumikan kay dili sila mo isyu og building permit kon dili makatuman sa minimum standards.

Gipabibawo usab ni Catalan nga ang Department of Public Works and Highway (DPWH) nipagawas og memorandum circular niadtong tuig 2015 nga ang tanang building adunay Earthquake Recording Instrumentation(ERI).

Ug kon dili makita sa plano ingon man sa actual building ang ERI walay building permit ug occupancy nga iisyu ang OBO.

Ang ERI ibutang kini sa mga government building, commercial building nga dagko ug tag-as, hospitals ug uban pa.

Gibutyag ni Catalan nga nakadawat na usab sila og laing memorandum circular gikan sa DPWH mahitungod sa inspection sa mga building alang sa earthquake vulnerability o damage ingon man implementasyon sa remedial works sa affected areas.

Gitataw ni Catalan nga sa wala pa ang maong memorandum circular sa DPWH ang OBO Cebu City kada adlaw nga nag-inspect sa mga building ilabi na sa mga nag-construct pa diin kutob sa ilahang maagian hapiton nila aron pagsusi kon aduna bay project engineer o safety engineer ug kon masuta nga wala makaisyu sila og violation gumikan kay importante ang maong mga tawo aron maoy mo-oversee sa proyekto ug malikayan ang sayop nga implementasyon sa plano nga giaprobahan sa OBO.

Kada tuig usab ang OBO adunay gihimong inspection sa mga edipisyo sa Siyudad sa Sugbo. —BDB (BANATNEWS)