Poste ni-spark, 15 ka balay nasunog

CEBU, Philippines — Miabot sa 15 ka panimay ang naugdaw human nitumaw ang sunog sa Daruhan Drive, Purok Tambis, Barangay San Roque, Dakbayan sa Talisay niadtong Sabado sa gabii.

Si Senior Fire Officer 2 Guiller Pegarido sa Talisay City Fire Station nagkanayon nga nagsugod ang sunog sa panimay ni Maryno Calviz.

Ilang giisa sa first alarm hangtud nga gisaka sa second alarm human sila nakasinati og kalisdanan sa sudlonon nga lugar.

Matud pa ni Pegarido nga nalubong ang ilang mga fire trucks gumikan sa kahumok sa yuta hinungdan nga ilang gisumpay-sumpay ang ilang mga hose.

Natabangan sab sila sa ubang kabumberohan sa Siyudad sa Sugbo ug mga fire brigades sa Barangay Tabunok. Nakontrolar ang sunog  alas 11:54 sa gabie.

Si Pegarido nitataw nga base sa ilang inisyal nila nga pakisusi giingong dunay mga residenteng nakamatikod nga ni-spark ang poste sa VECO niadto pang Biyernes sa gabii.

Apan wala kini gipanumbaling sa mga molupyo o pag report naman lang.

Nitumaw pagbalik ang pag spark sa poste hangtud nga nisilaob na kini ug mitapon ang kalayo sa panimay ni Calviz.

Ang mga balay ginama sa light ug concrete materials hinungdan nga dali ang pagkatap sa kayo sa mga silingang pinuy-anan.

Gibana-bana nga moabot sa P600,000 ang danyos sa sunog.

Wala ra hinuoy mga tawo nga nakalas ug nasamdan sa maong panghitabo.

Sa pikas bahin, ang Visayan Electric naghimo pa og imbestigasyon bahin sa maong hitabo, apan miawhag sa publiko nga kun duna gani mga poste nga mag-spark o masunog kinahanglan gyud nila kining i-report.

“Visayan Electric is still investigating the incident.  We would, however, like to remind consumers that they should report any electrical emergencies right away so that these can be attended to and addressed. The Visayan Electric customer service hotline 2308326 and our Facebook page is available 24/7 to receive such reports.” matud pa sa pamahayag ni Quennie Sanchez Bronce, ang tigpamaba sa VE.—IBM (BANATNEWS)