Mga kaalyado sa BOPK nitambong sa tigom ni Pacquiao
CEBU, Philippines — Giklaro nila ni Cebu City South District Councilor Eugenio Gabuya Jr. ug sa presidente sa Liga ng mga Barangay-Cebu City Chapter Franklyn Ong nga personal nila nga kapasidad ang pagtambong nila sa panagtigom kauban kang Manny Pacquiao sa niaging adlaw dinhi sa Sugbo ug wala nila gipresentar ang pangalan sa ilang grupo.
Nailhan sila si Gabuya ug Ong nga mga miyembro sa Bando Osmeña Pundok Kauswagan (BOPK) nga gidumala ni kanhi mayor Tomas Osmeña.
Nasayran nga mayoridad usab sa mga kapitan sa Siyudad sa Sugbo nga giingong kaalyado sa BOPK ang nitambong usab sa maong kalihokan. Giklaro ni Ong nga wala pa’y opisyal nga anunsiyo ang iyang partido kabahin sa national party nga ilang suportahan.
Matud niya nga i-anunsiyo ra nila kini sa tukmang panahon pinaagi sa ilang founder.
Samtang si Gabuya sa iyang bahin, gitataw niini nga suportahan gyud niya ang kandidatura sa boxing icon kinsa modagan pagka-presidente sa nasud.
Gani kauban usab niya sa pag-endorso kang Pacquiao mao si Konsehal Lea Japson.
Nagkanayon si Gabuya nga wala usab niya girekomendar si Pacquiao sa BOPK diin respetohon niya ang mahimong mapili ni Osmeña. Ug kong laing kandidato ang mapili sa iyang local party dili gihapon siya mobiya sa BOPK apan lahi ang iyang national party.
Si Gabuya anaa na kini sa kataposang termino isip konsehal sa siyudad apan magpabilin ang paghatag kaniya og lig-ong suporta sa BOPK. Kalabot usab sa slate sa BOPK, matud pa niya nga kompleto na ug aduna ra’y gamay nga gi-finalize. BDB (BANATNEWS)
- Latest
