Bogo mag-implementar na sa clamping ordinance

CEBU, Philippines — Gikatakdang karong Enero 15, 2021 magsugod na ang Siyudad sa Bogo pagpatuman sa "Wheel Clamping Ordinance" sa siyudad.

Alang kini sa mga sakyanan nga ilegal nga iparad diha sa mga kadalanan sa siyudad.

Ang makalapas sa maong ordinansa mamahimong makabayad og P2 mil nga multa.

Ubos usab sa maong ordinansa nga kadtong motangtang sa wheel clamps makabayad usab kini og P2 mil nga multa o usa ka bulan nga pagkapriso.

Ang tag-iya o drayber sa sakyanan nga gi-clamp hatagan og hangtud tulo ka oras aron mo-request pagtangtang sa clamp pinaagi sa pagbayad sa multa.

"Otherwise an additional fine of two hundred pesos (P200) per hour and a fraction thereof shall be changed against said driver/operator/owner", laing tipik sa ordinansa.

Sa laing bahin, nabalda ang road clearing sa Dakbayan sa Talisay tungod sa pagsige og uwan.

Nasayran nga anaa na sa 75 porsyento ang siyudad sa paglimpiyo sa kadalanan niini.

Kini maoy gitug-an ni Edwin Nierves, pangulo sa task force sa siyudad.

Matud ni Nierves nga tagtulo ka barangay sa usa ka adlaw ang ilang pahigayonan og operasyon ug tungod sa pagsige og uwan nalangan ang ilang operasyon.

Gibutyag ni Nierves nga niabot na ngadto sa 50 ka ilegal nga estraktura ang ilang naguba nga gitukod diha sa luna sa gobiyerno.

Ang maong paglimpiyo sa kadalanan ubos kini sa kamandoan sa Department of Interior and Local Government.

Ang DILG molibot kini diha sa nagkalain-laing barangay sa siyudad aron masuta nga ang siyudad nituman sa kamandoan.  —Gabriel C. Bonjoc/BDB (BANATNEWS)