Koleksyon sa basura sa pipila ka barangay sa Talisay way klaro?

CEBU, Philippines — Koleksyon sa basura sa Dakbayan sa Talisay daghan ang mireklamo sumala pa ni Edwin Nierves, officer in-charge sa collection and transport sa Ecological Solid Waste Management (ESWM).

Ang reklamo sa pagkolekta sa basura napagya sab sa social media. Gani si kapitan Benjie Cabigas sa Barangay Tabunok miingon nga nakadawat nasab siya og reklamo labot sa nagtipun-og nga wa makolektang basura sa ilang lugar.

Ang koleksyon sa basura gitugyan na kini sa kagamhanan sa siyudad ngadto sa pribadong kompaniya.

Usa sa mga residente sa Barangay San Roque nga nakahinabi sa Banat News mibasol sa mangolekta sa basura kay bisan gani schedule sa koleksyon sa basura libog kaayo mao nga ilaha nalang gyud isulod og sako ug ibutang sa kilid sa karsada tungod kay mobaho sa ilang balay.

Si Nierves nitataw nga siya mismo nisusi niini nga problema ug iyang nahibaw-an nga unom ka trak sa 20 sa pribadong kompaniya nga gi-hire sa siyudad ang nangaguba.

Giawhag niya ang mga barangay nga dunay garbage trucks nga gamiton lang una kini aron dili magtipun-og ang mga basura. Sa pikas bahin, gisugdan na pagtukod ang labing una nga Material Recovery Facility (MRF) sa dakbayan nga buot ipasunod sab ngadto sa ubang mga barangay. Si Nierves miingon nga makatabang kini sa waste reduction sa siyudad ug posible pa nga mahimo pang panginabuhian sa mga tawo.

Ang MRF makita diha kilid sa command center nga naa ra gihapon sa compound sa Talisay City Hall.

Dinhi gipamutang ang mga plastik nga botelya nga natigom sa siyudad, barangay ug sa mga tunghaan nga ilang himuong pangsala sa mga plastic nga basura diha sa mga kasapaan. Duna sab kini shredder nga hinatag  sa Department of Agriculture aron galingong ang mga dahon ug mga sagbot aron himuong organic fertilizer.

Si Nierves nanghinaot nga kining ilang himuon sundon sa mga opisyales sa matag barangay.— IBM (BANATNEWS)