Backrider sa motor nga pamilya ipabalik

CEBU, Philippines — Daghan ang wala kauyon sa “no back-rider policy” sa mga motorsiklo ilabi na kadtong mga tawo nga nagsalig niini nga makaadto sa ilang trabaho.

Nasayran nga bisan asawa, igsuon o immediate family dili pwede moangkas isip kabahin sa social distancing policy nga gipatuman batok sa coronavirus disease.

Nunot niini si Cebu City Mayor Edgardo Labella nagpadala og suwat kang Department of Transportation Secretary Arthur Tugade aron ikonsiderar ang desisyon.

“I’m respectfully appealing to Secretary nga i-reconsider lang unta ng no back-rider policy and except those who are able to present identification cards that they are really members of the family,” matud ni Labella.

Gipaneguro sa mayor ngadto sa DOTr nga ang kagamhanan sa Siyudad sa Sugbo mohimo sa ilang trabaho nga ang guidelines sa DOTr mapatuman og sakto ug nanghinaut si Labella nga dunggon ang ilang hangyo.

Samtang nagpadala sab og suwat si Labella kang Association of Barangay Councils president Franklyn Ong nga manduan ang tanang 80 ka barangay sa pag-submit sa daily reports sa implementasyon sa curfew ug ubang executive orders ug measures batok sa COVID-19.

Si Lapu-Lapu City Mayor Junard “Ahong” Chan nipadala sab og suwat kang Tugade sa samang tumong ni Labella.

Matud ni Chan nga hugot ang ilang suporta sa lakang sa kagamhanan sa pagpugong sa pagkaylap sa COVID-19 apan mohangyo siya nga hatagan og konsiderasyon ang iyang konstituwente nga walay lain pamaagi sa transportasyon kung dili ang motorsiklo.

Sumala pa ni Chan nga nadungog niya ang yangungo sa katawhan ilabi na sa mga trabahante nga ihatud sa ilang mga bana ang mga asawa padulong sa trabaho.

Buot ni Chan nga ibalik ang exemption sa magtiayon ug immediate family kay magkauban man gihapon sila sa ilang panimalay.

Dugang ni Chan nga sa iyang suwat nga gipadala kang Tugade gisugyot niya ang pagpresentar og proof of relationship ang magsakay sa motorsiklo. Rowena D. Capistrano/GMR (BANATNEWS)