Nagpatay sa upat ka polis nasikop

CEBU, Philippines — Tulo ka gipasanginlang mga sakop sa New People’s Army (NPA) ang gidakop sa kapolisan pinasikad sa warrant of arrest tungod sa kasong murder sa pagkapatay sa upat ka polis sa lungsod sa Ayungon sa Negros Oriental sa nakalabay nga tuig.

Ang mga sakop sa 704th Maneuver Company, Regional Mobile Force Battalion 7 sa Isla sa Negros maoy ni-serve sa warrant of arrest nga giluwatan ni

Judge Rosario Carriaga sa Regional Trial Court (RTC) Branch 75 sa Dakbayan sa Bais, Negros Oriental batok ni Jelly Ebedi niadtong Pebrero 18 sa gabii sa Barangay Bumentritt, Murcia, Negros Occidental.

Gihimu dayon ang follow up operation niadtong Pebrero 22 ug nadakpan mao si Gellie Ebedo sa Barangay Singcang sa Dakbayan sa Bacolod.  Nasundan dayon sa pagkasikop pagka Pebrero 23 ang ilang amahan nga si Belly Ebedo didto sa Sitio Biasong, Barangay Tayak sa lungsod sa Siaton, Negros Oriental.

Matud ni PRO7 Regional Director Police Brigadier General Albert Ferro nga ang upat mao ang ikapito na nga nadakpan sa mga responsable sa pagpatay nilang Police Corporal Relebert Beronio, Patrolman Roel Cabellon, Patrolman Marquino de Leon ug Patrolman Raffy Callao nga pulos mga sakop sa RMFB7.

Ang upat ka mga polis nagpahigayon og surveillance sa bukirang bahin sa lungsod sa Ayungon.  Apan gipalibutan dayon kini sa gibanabanang 30 ka armadong lalaki nga gituohang mga rebeldeng NPA ug brutal sila nga gipamatay.

Si Ferro misaad nga dili sila mohunong hangtud di madakpan ang tanang nalambigit sa maong krimen.

Walay nakuhang mga armas gikan sa mga dinakpan kay atol sa pag-serve sa warrant nagtrabaho sila isip mga construction workers.

Dako ang pasalamat sa kapolisan sab sa pagtumaw sa saksi sa pagpatay sa upat ka polis ug positibo niining gitumbok ang tulo nga apil gyud sa pagpusil sa mga biktima.

Matud pa sa testigo nga silingan ra sa tulo, gipatay ang mga biktima samtang gilibotan sa maong mga armadong mga lalaki.

Si Presidente Duterte misaad nga mohatag og P7 milyones nga ganit niadtong makatumbok kun kinsa ang mga mamumuno sa upat ka polis.  Gipasalig ni Ferro nga hatagan og proteksyon ang testigo lakip ang pamilya niini.

Gawas sa upat, duna nay laing upat sab ka mga gidudahang NPA nga nalakip sa mga nagpatay sa maong mga polis ang nadakpan na sa kapolisan sa nakalabay nga tuig. /IBM (BANATNEWS)