15-anyos gisumbag patay
CEBU, Philippines — Patay ang 15-anyos nga lalaki human gikulata sa iyang klasmeyt sa Deca Homes Phase 1, Dumlog, Dakbayan sa Talisay niadtong Huwebes sa gabii.
Ang biktima nailhan nga si Nash Cañeda Empaces, taga Cabugnaan, San Isidro sa maong dakbayan, samtang ang suspek mao si Cegie Cristuta Galicia, 18, nagpuyo sa Sitio Juana, Biasong sa mao gihapon nga siyudad.
Sa inisyal nga imbestigasyon sa kapolisan nasayran nga aduna nay daan nga panaglalis ang biktima ug suspek sa cellphone. Ang biktima giingong gisungog nga “opaw” samtang nibawos kini ngadto sa suspek nga “bayot” hangtud nga nidaku ug naghagitay nga magsinukmagay.
Walay daghang estorya gisumbag sa suspek ang biktima sa iya tangkugo dayun sa iyang tuo nga kuto-kuto hinungdan sa pagkahagba ug naglisud sa pagginhawa.
Ang ginikanan sa biktima naabot sa lugar ug gidala ang ilang anak sa Talisay City District Hospital apan gideklarar nga dead on arrival hinungdan nga gidakop ang suspek ug gitanggong sa bilanggoan samtang gikatakdang pasakaan og kaso. /GMR (BANATNEWS)
- Latest
