Rota sa prosesyon hawanan sa mga manindahay

CEBU, Philippines — Giawhag sa Cebu City Police Office ang mga manindahay sa dalan ang pagsabot nga temporaryo nga biyaan una nila ang pwesto alang lang sa solemn procession sa Sinulog 2020.

Kini alang sa paghatag og hapsay ug kalinaw atol sa mga kalihukan sa simbahan.

Matud ni CCPO Deputy City Director for Operation, Police Lieutenant Colonel Randy Korret, nga buhaton gihapon nila ang template sa nilabay nga Sinulog 2019 alang sa umaabot nga Sinulog 2020.

Dugang pa ni Korret nga anaa na sila sa 90 porsyento sa pangpangdam sa seguridad alang sa mga dagku nga kalihukan sa simbahan ug sa Sinulog Foundation, Inc.

Gihangyo gihapon sa kapolisan ang publiko nga dili magdala sa backpack, jacket ug uban pa nga ginadili nga mga gamit atol sa procession.

Ang walk through gisugdan gikan sa Basilica Minore del Santo Niño subay sa dalan nga maagian sama sa Osmeña Blvd., V. Rama, B. Rodriguez, Katipunan ug balik na paingon sa Basilica diin gibanabana kini ngadto sa unom kilometros ang gilay-on.

Gitambongan ang maong kalihukan sa kadagkuan sa Basilica Minore del Santo Niño, CCPO ug ang Operation Division sa Police Regional Office 7 aron sa pagseguro sa han-ay sa procession. /GMR (BANATNEWS)