Mga kandidato bawal sa graduation rites

CEBU, Philippines — Ang lokal nga opisyal sa Department of Education (DepEd) mipahimangno sa mga kandidato nga likayan ang pagpangampanya sa mga seremonyas sa graduation rites sa mga tunghaan.

Kini human nga sa mga graduation rites, aduna gyuy imbitadong mga politiko nga hatagan sab og higayon nga makaestorya sa entablado.

Sa interbyu sa Banat News, si Dr. Bianito Dagatan, DepEd Cebu City Schools Division superintendent, mipasidaan bahin sa DepEd Order No. 2, gi-issue niadtong Pebrero 18, 2019, nga magsilbing guidelines sa pag-organisar sa moving up ug graduation rites sa Kindergarten ngadto sa Senior High karong tuiga.

Gusto sa DepEd nga magpabilin nga “solemn” ug “nonpartisan” ang mga seremoniyas.

“...the EOSY (End-Of-School-Year) rites and moving up or completion ceremony shall be conducted in an appropriate solemn ceremony befitting the learners and their parents, and shall not be used as a political forum,” matud pa sa kamandoan.

Gidid-an ang mga politiko nga mangampanya  aning maong mga kalihokan nga himuon gikan Abril 1 hangtud Abril 5.

Dugang DepEd Memorandum No. 31 usab ang giisyu niadtong Marso 14, 2019, nagpasidaan sa mga magtutudlo nga magpabiling neutral aron di makasohan.

Gimandoan sila nga dili mangimbitar og mga politiko lokal man o nasyonal sa maong seremonyas.

“Political neutrality shall be observed at all times and everyone is enjoined to make a unified stand that the schools are neutral zones. Thus, all requests addressed to DepEd officials and employees for them to participate in consultative assemblies or meetings, shall not be allowed. This also covers requests for the use of public schools as venues for the said meetings or consultations,” dugang niini.

Si DepEd-Region 7 Director Dr. Julieta Jeruta mipasidaan nga kadtong mga prinsipal nga molapas niini posibleng mag-atubang og  kasong administratiba.( /IBM)(BANATNEWS)