Upat patay sa Carcar

CEBU, Philippines — Upat ang patay ug duha ang angol sa managlahi nga pagpamusil sa Dakbayan sa Carcar sulod lamang sa 24-oras niadtong nakalabay nga adlaw nga Miyerkules.

Alas-12 sa kaadlawon sa may Sitio Bonbon, Barangay Ocaña sa maong dakbayan nakalas sila si Primitivo Gemo, Donde Carbajal, ug Raprap Navares, residente sa Sitio Puesto, Barangay Napo. Naangol sab si Sherwin Gemo. Duha ka mga mamumuno nga pulos nagsuot og full-faced helmets luwan sa motorsiklo ang mga kriminal.

Matud pa ni Supt. Gregorio Galsim, hepe sa Carcar City Police Station, nag-inom ang mga biktima sa ilang Primitivo sa dihang niabot ang mga mamumuno ug gipaulanan sila og bala. Dead on the spot silang Gemo ug Navares.

Samtang si Carbajal ug Gemo (Sherwin) nadala pa sa tambalanan sa Carcar District Hospital apan gideklarar si Carbajal nga patay na samtang si Gemo gibalhin sa tambalanan sa Dakbayan sa Sugbo.

Gisusi karon sa kapolisan ang inisyal nilang kasayuran nga nalambigit sa ilegal nga drugas ang mga biktima. Gitug-an ni Galsim, aduna na silay person of interest apan dili pa nila mabutyag sa pagkakaron.

Sayo nianang Miyerkules sa hapon gipusil patay diha sa Sitio Ylaya Dapdap, Barangay Poblacion 3,  ang usa ka wala pa mailhing lalaki  samtang usa ang naangol nga mao si Abner Barutag, 27, residente sa maong lugar.

Samtang ang gitumbok nga mamumuno mao si Jephrel Omandac, 21, residente sa maong lugar.

Nasuta sa imbestigasyon nga aduna nay karaang panagbangi ang mga biktima ug ang suspetsado. Ang suspetsado nigamit og pugakhang sa pagpusil sa  duha.

Nakuha sa kapulisan gikan sa hawakan sa namatay nga biktima ang .38 revolver kinsa nakaangkon ug samad sa dughan nga maoy naingnan sa hinanali niining kamatayon.

Samtang si Barutag naigo diha sa walang abaga ug nagpabilin pa karon sa tambalanan. Padayon pa karon nihimo ug hot pursuit operation ang kapulisan batok sa suspetsado.-  IBM (BANAT NEWS)