PRO-7: Nob.1 malinawon
Camille Pateres (Banat) - November 2, 2018 - 12:00am

CEBU, Philippines — Gihulagway nga malinawon ang tibuok rehiyon atol sa unang adlaw sa paghinumdom sa Kalag-kalag 2018 kagahapon.

Base sa datos gikan sa Police Regional Office-7, wala silay nalista nga insidente labot sa adlaw sa mga santos kagahapon. Natala ang 260,345 ka mga tawo nga mibisita sa mga sam-ang sa tibuok rehiyon.Niining pagsuwat, gibana-bana ni Garma nga miabot na ngadto sa 20 ka libo ka mga indibidwal ang mibisita sa tanang sam-ang sa Dakbayan sa Sugbo.

Apan matud ni Garma mas modaghan kini ini og ka gabii tungod kay dili na init ang adlaw. Si Chief Inspector Wilbert Parilla, hepe sa Cebu City Police Office Operations Branch, nagkanayon nga mamahimong tungod sab sa long weekend maong nanagkot nang daan ang uban. “So far sukad nadestino ko diri, karon ang pinaka malinawon nga unang adlaw sa kalag-kalag,” si Parilla nagkanayon.

Butyag ni Garma nga miabag sila sa kapolisan sa probinsya pagbantay sulod sa mga terminal sa bus human nasuta nila nga migrabe ang pagdagsa sa mga pasahero paingon sa probinsya.

Wanted nasikop

Sa laing bahin, ang hepe sa Cebu Provincial Police Office nga si Police Senior Supt. Manuel Javier Abrugena nga adunay gibana-banang 140,000 ka mga indibidwal nga mibisita sa nagkadaiyang sam-ang sa probinsya sa Sugbo.

Butyag ni Abrugena dungan sa pagsiguro nila sa seguridad ang pag-monitor nila sa mga wanted persons nga moduaw sa mga sam-ang. Gani, kagahapon pa lang nakadakop na sila og lima ka mga wanted sa nagkadaiyang distrito sa probinsya nga miduaw sa mga sam-ang.

Nagdasok dayon

Nagmalinawon ang pagdagasa sa mga tawo nga nibisita sa ilang mga mahal sa kinabuhi nga nitaliwan na didto sa Calamba Cemetery, usa sa pinakadakong pampublikong sam-ang sa Dakbayan sa Sugbo kagahapon. Sayo palang sa buntag nagsugod og pangabot ang mga tawo ug wala na nilurang ang pagdasok hangtud kagabii bisan pa man sa naglagiting nga kainit sa panahon.

Apan bisan pa man niini, ang kapolisan nakaobserbar nga mas menus ang gidaghanon sa mga tawo kagahapong adlawa kon itandi sa Nobiyembre 1 sa miaging tuig. Gituohang karong adlawa pa moduaw ang uban ug posibleng ang uban nakaduaw na niadto pang nakalabay nga mga adlaw paglikay sa pagdasok sa mga tawo.

Natagbaw

Kagahapon ang pamilya ni Cebu City Mayor Tomas Osmeña mibisita sa Doña Pepang Cemetery sa Barangay Tejero aron managkot. Diha sa maong sam-ang nahimutang ang mausoleum ni Estafania “Doña Pepang” Veloso-Osmeña, ang asawa ni kanhi Presidente ug Cebu’s “Grand old Man” Sergio Osmeña Sr.

Mihalad sila og pag-ampo alang sa mitaliwan nila nga mga minahal sa kinabuhi. Ang mayor mihulagway nga maayo ang pagkadumala sa seguridad  ug malinawon ra ang pag-obserbar sa kalag-kalag.

“That’s SOP already they know what they have to do, wa tay problema annual, it’s just photocopy template. I’m very satisfied,” matud ni Osmeña

Samtang si Konsehal Dave Tumulak, Chairman sa Committee on Public Order and Safety misuroy usab sa mga sam-ang ug kini miingon nga normal lang ang sitwasyon gawas lang sa mga report nga dunay mga nawad-an og panimuot.

Gikan buntag hangtod sa hapon walay nadawat nga report sa insidente sama sa pagpangawat o gubot ang kapolisan diha sa mga sementeryo. Apan adunay gisakmitan og pito ka burners nga mga tindera sulod sa sam-ang lakip na ang mga hait nga butang gamit paglimpyo sa mga nitso. Samtang  malinawon usab kagahapon ikaunom nga distrito sa lalawigan sa Sugbo nga gilangkoban sa Lungsod sa Cordova, Lungsod sa Consolacion ug Dakbayan sa Mandaue. - Decemay Padilla, Le Phyllis Antojado, Rowena Capistrano ug Romeo Limpangog/IBM (BANATNEWS)

MALINAWON
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with