Konsehal gipasanginlang nangulata

CEBU, Philippines – Nidangop kang Konsehal Dave Tumulak sa Dakbayan sa Sugbo ang duha ka lalaki nga giingong gikulata sa konsehal sa Barangay Sawang Calero aron mangayo og tabang.

Ang mga biktima nga si Arnel Jurado, 45, ug Ricky Jurado, 68, nipasangil nga gikulata sila ni Konsehal Darius Borja human sila pasanginli nga nanglabay og botelya samtang nagpahigayon og parada sila si Borja niadtong Martes sa hapon.

Ang duha niingon nga igo lang sila nanan-aw sa parada ug wala sila nanglabay og botelya.

"Katong botelya, ila to, puros man to sila nag-inom tanan," sigun ni Arnel.

Apan gihimakak ni Borja ang maong pasangil ug siya niingon nga igo lang sila nagselebrar sa ilang kadaugan dihang kalit lang nanglabay og botelya si Arnel nga supporter sa laing grupo.

Gani matud ni Borja nga iyang gisuwayan og gukod si Arnel aron dili kini makulatahan sa mga naggukod niya. "Gusto unta ko ma-safety siya kay lisud sad kaayo og makuptan to, jambolan gyud to," sigun ni Borja.

Magpaabot si Borja kung unsay himoong lakang sa duha ug andam sila motubag sa reklamo.

Gitambagan ni Tumulak ang duha nga mopasaka og reklamo sa barangay hall.

"If ever, wala gyuy mediation mahitabo, that's the time ang barangay mo-issue og certification to file action kay nag-involve ra ba ni og barangay official," dugang ni Tumulak. Awhag ni Tumulak nga humana ang eleksiyon ug badlungon ang mga supporters sa mga kandidato aron malinawon ug hapsay ang barangay. (/GMR)(BANAT NEWS)