Sumilon Island abli na, Tumalog Falls sirad-an una

CEBU, Philippines — Sa pagbukas balik sa Sumilon Island sa lungsod sa Oslob, sugod karong adlawa, temporaryo usab pasirad-an sa lokal nga kagamhanan sa lungsod ang Tumalog Falls aron nga malimpyohan.

Ang pagpanglimpyo himoon sulod sa tulo ka adlaw sugod karong adlawa, hangtod sa Huwebes, Abril 19, 2018.

Matud ni Mayor Jun Tumulak iyang gihangyo ang mga habal-habal drivers nga limpyohan ang palibot sa maong tourist destination sanglit sila man ang direkta nga nakabenepisyo sa maong falls.

"Dili lang dapat mamasahero, mamadlong usab sila sa mga maghugaw hugaw," matud ni Tumulak.

Hinuon misanong ang mga drayber ug nagtinabangay sa paglimpyo sa Tumalog Falls.

Sumala ni Tumulak nga adunay tiglimpyo sa Tumalog Falls nga taga munisipyo apan human sa Semana Santa diin gidagsa kini og mga turista, wala maato ang paglimpyo sa lugar.

Karong gibuksan na ang Sumilon Island alang sa mga turista nanghinaot si Tumulak nga mahimo nang responsable ang mga mobisita sa isla ug dili magpataka og labay sa ilang mga basura.

Dili momenus dos mil ka kilong basura ang nakuha gikan sa isla. Nunot niini, nasabotan sa mga opisyales sa Sumilon ug sa lungsod nga mogahin og usa ka adlaw aron paglimpyo sa isla kada bulan. (BANAT NEWS)