Calamba Cemetery daghan pa bakante

CEBU, Philippines - Bisan sa subsob nga kampanya sa kapolisan batok sa ilegal nga drugas diin daghan ang nangamatay, ang Calamba Cemetery sa Dakbayan sa Sugbo wala pa nagkuwang sa kalubngan tungod kay bukas gihapon silang modawat sa tanang ilubong sa maong sam-ang.

Kini ang gibutyag ni Antonio Baguio, caretaker sa maong sam-ang sulod na sa 40 ka tuig.

Matud ni Baguio nga lisud ang magdala sa sementeryo ilabi na daghan kaayo ang angayan nga bantayan ilabi na kung adunay mga magpasiaw.

Sukad gisugdan ang Oplan Tukhang ug mga police operations sa nilabay nga tuig hangtud karon, ubay-ubay na ang gilubong sa maong sam-ang pinaagi sa nitso ug ang uban sa yuta.

Sumala pa ni Baguio nga bisan sa kapobre sa mga namatay, gihatagan gihapon kini og desente nga paglubong sa kabanay.

Ang pagpakawot og yuta magbayad og P1,500 samtang ang adunay mga kaya ipahiluna nila sa nitso nga adunay nagkadaiyang presyo nga nagsugod sa P7,000 ngadto sa P17,000.

Gibutyag ni Baguio nga nagpadayon sab ang ilang paghimo og mga nitso samtang kadtong mga niabot na sa tagal nga lubong ila kini habwaon aron adunay kabutangan sa bag-ong ilubong.

Natala sa listahan sa mga ilubong sa Calamba Cemetery karong Lunes mao si Frederick Villamala, ang inila nga hitman ni kanhi drug lord Tata Negro kinsa nakalas atol sa operasyon sa Philippine Drug Enforcement Agency.

Usa sa mga nalubong sa maong sam-ang ang inila sab nga drug lord nga si Jeffrey “Jaguar” Diaz diin nahimutang ang lubnganan sa usa ka suok nga bahin.

Si Celedonia Orola, 25 ka tuig na nga mananabtan sa Calamba Cemetery, nitug-an nga wala pa hinoon siya kasugat nga ang iyang giampoan biktima sa tukhang o police operations tungod kay dili naman siya magpangutana.

Dugang ni Orola nga wala silay espesyal nga pag-ampo alang sa biktima sa tukhang o police operations kung dili susama ra kini og pag-ampo alang sa tanang kalag.

Gitug-an ni Orola nga P30 lang ang bayad sa parosaryo sa patay, samtang P200 kung nobenaryo diin sulod sa siyam ka adlaw ampoan lang kini sulod sa usa ka adlaw.

Matud ni Orola nga atol sa ilang pag-ampo, ilakip sab nila ang tanang kalag sa mga tawo ilabi na kadtong mga nahikalimtan.

Si Enrique Lapetaje, billing and collection supervisor sa St. Francis Funeral Homes, nitug-an nga karong tuiga aduna silay 10 ka patay ang wala pa makuha sa mga pamilya apan dili pa niya mabutyag kung biktima ba kini sa tukhang o police operations kay gikan man kini sa ilang lain-lain nga branches.

Sumala pa ni Lapetaje nga dunay mga nangagi nga nakalas tungod sa police operations ang gikuha sa ilang pamilya gamit ang ordinaryo lang nga lungon diin ang uban nangayo og abag sa Department of Social Welfare and Development ug sa Kapitolyo kinsa mohatag sab og burial assistance sa mga nanginahanglan.

Gitug-an ni Lapetaje nga dunay higayon nga ideretso na lang nila og lubong ang mga patay nga baho na kaayo ug walay mga pamilya nga mokuha.

Dugang ni Lapetaje nga kung maayo lang ang lawas sa patay, magpaabot pa sila og unom ka buwan hangtud adunay mokuha ug kung wala, diha na sila mohukom nga ipalubong.

Girekomendar ni Lapetaje nga mas maayo sab ang gobiyerno adunay kaugalingon nga morgue aron adunay kabutangan sa higayon nga adunay mga mamatay nga walay tagtungod ug pamilya nga mokuha.

Samtang ang Commission on Human Rights naka-docket na og 64 ka imbestigasyon gikan niadtong Mayo karong tuiga nga kadaghanan police operations ug pipila lang ang motorcycle riding in tandem.

Matud pa ni Leo Villarino, chief investigator sa CHR-7, nga pipila na lang karon ang modangop sa ilang buhatan nga mga walk-in clients human naundang sa makadiyot ang Oplan Tukhang tungod kay kadaghanan kanila ang maglisud pagkuha og mga saksi.

Gitug-an ni Villarino nga nagpahigayon na lang sila og kinaugalingon nga imbestigasyon base sa mga balita nga ilang makuha. (BANAT NEWS)