Mabdos, magsuong babaye sikop sa buy-bust

CEBU, Philippines - Nadakpan sa sunod-sunod nga buy-bust operation sa mga sakop sa City Intelligence Branch  ug City Drug Enforcement Unit sa Lapu-Lapu City Police Office ang pito ka gikatahapang pushers nga naglakip sa unom ka buwan na nga nagmabdos nga babaye.

Si Chief Inspector Mark Gifter Sucalit, hepe sa CIB sa LLCPO, niila sa mabdos nga si Mary Jane Cabugnason Palagnas, 23, taga Tugbongan, Consolacion.

Kini nadakpan alas 9 pasado sa niaging gabii sa Purok Lato, Barangay Calawisan sa maong dakbayan nga kauban sa target sa operation nga si Mark Anthony Purisima Ramos, 44, driver ug nagpuyo sa Sitio Telecom, Cabancalan, Dakbayan sa Mandaue.

Nasakmit ang tulo ka medium-size nga gituohang shabu gikan kang Ramos nga nagkantidad og P177,000 ug nasakmit sab ang buy-bust money gikan sa mabdos nga gibandol nga boodle money nga gipaibabwan og tinuod nga P500.

Nadakpan sab sa Purok African Daisy sa Sitio Locatha, Looc, Dakbayan sa Lapu-Lapu ang gikatahapang pusher nga si Efren Baring Dalion, 44, welder; Gerson Leonaldo Dalion, 25, ug Ronaldo Maloloy-on Igot, 47, ug nasakmit ang mokabat sa P78,116 nga shabu.

Dugang nadakpan mao sila si Armando Baring Magunsay alyas Iboy, 57, ug Christopher Fuentes Dalion, 27, pulos nagpuyo sa maong dapit ug nasakmit ang P71,036 nga kantidad sa shabu.

Samtang sikop ang durugista sa Sitio Sambagan, Tabunok, Dakbayan sa Talisay niadtong Martes sa gabii.

 Ang dinakpan mao si Marjun Rago alyas Negro, 25, ulitawo nga nagpuyo sa sitio Romahan, Barangay Dumlog sa maong siyudad.

Ang kapolisan pinangulohan ni SPO2 Yvonne Ilustrisimo sa Talisay City Police Station ang nakadawat og sumbong sa presensiya sa mga durugista sa lugar.

Niresponde ang mga awtoridad pinaagi sa paglakaw lang aron dili dali nga mabantayan.

Si Rago maoy ilang nakit-ang kadudahan og lihok hinungdan sa ilang pagsita ug nakuhaan kini og 24 ka gagmay nga pakete sa shabu nga balor og P11,328.

Sa laing bahin, duha ka babaye ang nasikop sa gipahigayon nga buy-bust operation sa mga sakop sa Philippine Drug Enforcement Agency-7 sa San Miguel, Cordova ala una sa kadlawon niadtong Miyerkules.

Ang nasikop naglangkub nilang Michelle Maspiñas, 41, ang subject sa buy-bust ug residente sa Saac, Buaya, Lapu-Lapu City ug Gerle Maspiñas, 35, walay trabaho.

Giingong taud-taud na nga gi-monitor sa ahensiya ang binuhatan sa managsuon hangtud nasuta nga positibo.

Nakuha gikan sa mga dinakpan ang 14 ka putos sa ginadili nga drugas nga mobalor og P102 mil. (BANAT NEWS)