PISTON caravan wa makaparalisar sa transportasyon

CEBU, Philippines - Wala makaparalisar ug wala makaapekto sa mga sumasakay sa Metro Cebu ang gipahigayong transport caravan sa grupong Pinagkaisang Samahan ng mga Tsuper Nationwide uban sa mga nagkadaiyang grupo.

Gisugdan sa grupo ang ilang kalihukan sa may Brgy. Ibabao-Estancia sa Dakbayan sa Mandaue. Pagka alas 8 sa buntag nagsugod ang ilang caravan paingon sa Dakbayan sa Lapu-Lapu, balik sa Mandaue dayon sa Cebu City ngadto na sa Siyudad sa Talisay ug gitapos atubangan sa buhatan sa Land Transportation Franchising and Regulatory Board-7.

Matud ni Greg Perez, coordinator sa PISTON Cebu, nga ang ilang kalihukan subay sa ilang hugot nga pagsupak sa pag-phase out sa public utility vehicles nga 15 ka tuig pataas. Dugang niya nga sa kinatibuk-an, malinawon ang ilang gipahigayong caravan nga gisalmotan sa dili mominos usa ka gatos nilang mga sakop ug pipila ka grupo nga nakigduyog kanila. Iyang gibutyag nga 15 ka sakyanan ug 20 ka motorsiklo ang niuban. Hinoon iyang giangkon nga nakadugang sila sa bul-og sa trapiko.

Nunot niini, gipasalamatan ni LTFRB-7 regional director Ahmed Cuizon ang nangulo sa caravan kay wala ra kini nakabalda ingon man sa mga LGU nga mi-manage sa trapiko sa kadalanan atol sa maong caravan.

Dugang niini nga naminaw usab siya sa yangungo sa mga drayber ug siya nanghinaut nga hatagan nila og higayon ang gobiyerno sa ilang bag-ong initiatives sa transportasyon.

“Instead of rejecting the PUJ Modernization Program, for instance, Piston should welcome the fact that the government has arranged for a low-interest credit facility to enable them to hop on board our efforts for progress.

We therefore call on them to open their minds to change instead of resisting it,” dugang pa ni Cuizon. Mitchelle L. Palaubsanon, Rowena D. Capistrano, Romeo T. Limpangog ug Girlie Macalua (BANAT NEWS)