Yarda sa Looc, Mandaue gipasirad-an
CEBU, Philippines - Gipasirad-an na ni Mandaue City Mayor Gabriel Luis Quisumbing ang yarda sa mga container vans sa usa ka freight sa Barangay Looc nga una na nga gireklamo sa mga residente.
Si Quisumbing niluwat sa closure order niadtong Abril 17, 2017 apan na-served kini sa taga City Legal Office ug kapolisan niadtong Biyernes sa Philippine Multimodal Freight Services Inc. (PMFSI).
Giingong walay nidawat sa closure order hinungdan nga gipapilit na lang kini sa poste sa gate sa kompaniya.
Ang City Legal Office nisusi sa PMFSI niadtong Marso 13 diin nasuta nga rehistrado kini sa Barangay Alang-Alang ug dili sa Looc.
Si City Legal Officer Omar Redulla niluwat og Notice to Comply kang Anne Marie Louise Ugarte sa PMFSI ug napupos ang tagal niini niadtong Abril 13.
Niadtong Enero mokabat sa 280 ka residente nga gipangulohan ni Dr. Danilo Dionson ang niawhag sa kagamhanan sa siyudad sa dili na pag-renew sa permit sa PMFSI gumikan sa kahasol nga namugna niini sama sa pagkaguba sa karsada.
Sa iyang suwat niadtong Enero 25, si Louis Ugarte sa PMFSI nipahibawo kang Mandaue City Planning and Development Office acting chief Marlo Ocleasa nga ang ilang pag-abang sa lugar mapupos na karong Agosto 8 ug wala na silay plano nga mo-renew. (BANAT NEWS)
- Latest
