7 ray nipadayon sa 1, 900 ka drug surrenderers
CEBU, Philippines - Sa 1,900 ka drug surrenderers sa Dakbayan sa Bogo, pito lang ang nakahuman sa Rehabilitation and Reintegration (ReRe) Program sa lokal nga kagamhanan ug sa kapolisan.
Hinoon unang hugna pa lang kini sa ReRe’s Barkadahay sessions sa paghimong drug-free sulod sa 90 ka adlaw diin nagpaambitay sila sa ilang mga kasinatian ug kun unsa na sila karon samtang gipaubos sa drug test matag session.
"Mentras buhi pa ang tawo, pwede pa mag-bag-o," matud ni Jaime Piañar, usa sa nigradwar.
Bisan nakahuman na, ang mga nigradwar padayon gihapon nga moapil sa session sa sunod batch.
“Nadaug ninyo balik ang pagsalig sa inyong mga igsuon,” matud ni Bogo City Mayor Carlo Martinez.
Si Bogo City Police Station chief, PSupt. Byron Allatog, nipasabot nga dakong hagit ang nagpaabot sa mga nakagradwar diin lakip niini ang pagkombinsi sa ubang drug surrenderers nga moapil sa ReRe sessions.
Ang ReRe chairperson, Bise Mayor Mayel Martinez, nipadayag nga natagbaw sila sa kalampusan sa unang hugna bisan adunay pipila nga nagduda sa maong programa isip tugbang sa Opan Tukhang sa kapolisan ug ni Presidente Rodrigo Duterte.
Ang ReRe vice chairman nga si Niño Tolingin emosyonal nga nipaambit nga sa ilang pagsugod duha lang ang niapil apan wala sila nawad-i og paglaum ug ang importante alang kanila nga makatabang bisan usa ka kinabuhi. - /DILT) (BANAT NEWS)
- Latest
