Pagsaulog sa BPO Day matag Marso 28 giaprobahan
CEBU, Philippines — Giaprobahan sa Cebu City Council ang ordinansa nga nagdeklarar matag Marso 28 isip Business Process Outsourcing (BPO) Day, sa samang adlaw nga ang siyudad gipailawom sa Enhanced Community Quarantine (ECQ) alang sa pag highlight sa kontribusyon niini sa ekonomiya atol sa pakigbatok sa COVID-19 pandemic.
Mao kini ang ordinansa nga gimugna ni Konsehal Pancrasio Esparis, Chairman sa Committee of Social Services sa konseho.
Giaprobahan kini sa ikatulong pagbasa ug katapusang deliberasyon atol sa regular session sa konseho niadtong Miyerkules, Abril 24, 2024.
Ang ordinansa ni Esparis nitumbok nga ang industriya sa BPO “naka-infuse og binilyon” sa ekonomiya sa dakbayan sa Sugbo ug naghatag og liboan nga trabaho sa mga Sugbuanon.
“Through years since its establishment in Cebu, the industry has grown from strength to strength and has, in fact, prevailed against the economic ill-effects of Covid-19 because the men and women of the industry shouldered on,” pagkutlo sa ordinansa.
Ang ordinansa giulohan og "Business Process Outsourcing (BPO) Industry Day Ordinance of 2023".
Kini gimugna aron sa pag-ila sa kontribusyon sa industriya sa BPO. Segun sa naaprobahan, kini i-obserbar matag ika-28 sa Marso sa tibuok dakbayan sa Sugbo.
Gipadayag ni Esparis nga ang maong petsa gipili agig paghinumdom sa petsa nga ang siyudad gipailawom sa ECQ sa panahon sa Covid-19 pandemic.
Ang obserbasyon dugang nagtumong sa pagpalambo sa giingong mahinungdanong papel sa industriya sa BPO sa paglambo sa ekonomiya sa dakbayan sa Sugbo.
“To express gratitude towards the BPO industry, the employees and employers, for the efforts they exerted to keep the industry alive,” pagbasa sa tipik sa ordinansa.
Dugang pa, ang resolusyon nagpasiugda usab nga ang Department of Manpower Development and Placement (DMDP) maoy mangulo sa pagsaulog sa BPO Day. — /MEL (BANAT NEWS)
- Latest
