Motor nabitik sa alambre
CEBU, Philippines - Giawhag sa konseho sa Dakbayan sa Sugbo ang mga public utility companies sama sa Visayan Electric Company, Philippine Long Distance Telephone Company ug mga cable companies nga atimanon ang mga nagyunyon nila nga alambre sa karsada aron dili makapaaksidente.
Ang awhag gihimo tungod kay ang kapitan sa Barangay Talamban nitaho nga adunay usa ka tawo nga na-admit sa tambalanan human naaksidente sa nagbitay nga alambre sa karsada.
Si Lenieto Milan, taga Nivel Hills, Lahug, nipadala gyud og suwat ngadto kang Kapitan Arcilla ug niawhag nga atimanon gyud unta ang mga nagbitay nga alambre sa karsada.
Matud ni Milan nga nagsakay siya sa iyang motorsiklo dihang kalit lang nga nasangit ang iyang manobela sa nagbitay nga alambre.
Ang biktima na-admit gyud sa usa ka pribadong tambalanan tungod sa daghang pangos sa iyang kalawasan agi sa pagkabagnos sa karsada.
Sa laing bahin, si Konsehal Sisinio Andales niawhag sa mga kapitan sa lainlaing barangay nga mohatag og report ngadto sa City Engineer’s Office kabahin sa mga bati nga karsada sa ilang barangay.
Matud ni Andales nga kinahanglang masayud ang kadagkuan sa Department of Engineering and Public Works (DEPW) aron maatiman dayon nila ug kalikayan nga makamugna og aksidente. - /GMR) (BANAT NEWS)
- Latest
