Taga Sirao, Adlaon balhinon

CEBU, Philippines - Tinguha sa Division for the Welfare of the Urban Poor sa Dakbayan sa Sugbo ang pag-relocate sa mga apektadong pamilya sa pagdahili sa yuta sa Barangay Sirao ug Adlaon.

Kini ang gibutyag ni Genevieve Alcoseba human sa ilang pagsusi sa lugar aron makuha ang panahom sa mga apektadong molupyo.

Unang giadto ni Alcoseba ang Barangay Sirao diin matud sa mga residente nga gusto nila nga mo-avail sa lote sa relocation site kaysa balay ug yuta kay maglisud sila og bayad.

Matud pa nga wala kini problema kung dunay mahatag ang siyudad nga ipaagi sa National Housing Authority o sa Socialized Housing Finance Corporation.

Buot lang gyud sa mga residente sa Barangay Sirao nga ang ilang mabayran matag buwan dili molapas sa P500.

Dihang gipangutana ang DWUP kung duna nay luna, kini maoy ilang gitrabaho karon diin nagpa-inventory sila sa mga luna sa siyudad nga naa sa bukid sama sa Barangay Guba ug Taptap.

Kung dunay makita ang siyudad nga luna, ila kining ipasusi sa Mines and Geosciences Bureau aron maseguro nga luwas kining puy-an ug malikay sa kadaut ang mga residente.

Aron mapadali ang pagpangita og luna nagpatabang ang DWUP sa mga opisyal sa barangay ug sa Barangay Mayor’s Office.

“Kung naa silay kaila nga naay property nga willing nga ibaligya sa siyudad or national government atong tan-awon para ma-investigate nato immediately para mabayaran unya mahimong relocation unya atong mapa-sub-divide,” sigun ni Alcoseba.(BANAT NEWS)