Uyab ni Joavan nagdala og peke nga marriage contract

CEBU, Philippines - Usa ka babaye nga nangangkong asawa ni Joavan Fernandez, gisikop sa polis sulod sa Cebu Provincial Detention and Rehabilitation Center (CPDRC) human kini nagpakita og giingong peke nga marriage certificate.

Si Vergie Desuyo giingong gusto untang mo-conjugal visit kang Fernandez apan wala kini pasudla sa mga opisyal sa Provincial Public Safety Company (PPSC) human nasayran nga peke ang iyang gidala nga marriage certificate.

Matud ni PO1 Mark Henry Vertudazo ang niaresto kang Desuyo nga nisukol kini kaniya. Nihilak ang maong babaye dihang gihinabi sa mga sakop sa media ug nipasangil nga siya gipasakitan sa polis dihang giaresto, butang nga gihimakak usab ni Vertudazo. 

Ang team leader sa PPSC nga si PSIns. Zosimo Jabas nagkanayon nga base sa ilang pag-review sa CCTV, ilang nakita nga nisukol si Desuyo atol sa pag-aresto kaniya.

Dugang ni Jabas nga base sa record ni Fernandez, nakabutang niini nga “single” siya, butang nga nagpamatuod nga dili sila minyo ni Desuyo. Sa dihang gipangutana sa media si Desuyo bahin sa tinuod nga status sa relasyon nilang Fernandez, wala kini tarong tinubagan. Apan matud niya nga sulod sa tulo ka tuig na siyang nagbisitahan kang Fernandez sulod sa CPDRC ug igo ra unta siyang maghatod og pagkaon sa iyang hinigugma. Iyang gihimakak nga nalambigit siya og ilegal nga kalihukan.

Si Jabas nagkanayon nga nisulod si Desuyo sa CPDRC alang sa conjugal visit. Apan base sa ilang bag-ong polisiya, kinahanglan magpakita og marriage contract ang bana o asawa sa priso. Apan ang marriage certificate nga dala ni Desuyo gikomparar sa orihinal nga marriage certificate ug didto nasayran nga peke kini. Mag-atubang og mga kasong disobedience ug falsification of documents si Desuyo.

Kahinumduman nga si Joavan ang kontrobersiyal nga sinagop ni kanhi Talisay City Mayor Socrates Fernandez, nahukman nga prisohon sa tibuok niyang kinabuhi human nakumbikto sa kasong illegal possession of explosives. (BANAT NEWS)