Kalihukan sa Month of the Ocean gihan-ay

CEBU, Philippines - Naghan-ay na sa kalihukan sa Month of the Ocean karong buwana ang Department of Environment and Natural Resources-7.

Si Mario Aragon sa conservation and development division sa DENR-7, nagkanayon nga ang Philippine Information Agency (PIA) maoy naghan-ay sa deployment sa autonomous reef monitoring structure (ARMS) sa Panglao, Bohol.

Subay niini, ang Coastal Law Enforcement Alliance Region (CLEAR-7) padayon sa pagpalig-on sa pagpahigayon og seaborne patrol ilabi na sa Tañon Strait nga usa ka daku’ng protected seascape.

Ang Bureau of Fisheries and Aquatic Resources, Department of Environment and Natural Resources, Philippine National Police (PNP), local government units, volunteers lakip ang kagamhanan sa probinsiya pinaagi sa Cebu Provincial Anti-Illegal Fishing Task Force (CPAIFTF) ang padayon sa pag-promote sa kaimportante sa pagprotekta sa seascape.

Ang Tañon Strait Protected Seascape (TSPS) usa ka importante nga migration corridor diin nadiskubrehan kini niadtong 1998.

Ang Tañon Strait nahimo kining puy-anan sa mga marine species sama sa dolphins, whale, whale sharks ug uban pa.

Usa sab kini ka major fishing grounds aron makabaton og panginabuhian ang mga residente sa mga lugar nga nagpalibot niini nga gilangkuban sa pito ka siyudad, 12 ka lungsod ug 298 ka barangay.

Sa nilabay’ng tuig, ang CLEAR-7 nakapasaka og upat ka kaso sa ilegal nga panagat diin tulo sa maong kaso pending pa kini samtang ang usa nasang-at na sa korte.

Karong tuiga, P13 milyones ang gigahin alang sa seaborne operation ug assessment sa marine protected area o sanctuaries nga gidumala sa lokal nga kagamhanan. (BANAT NEWS)