Lalaki nang-hostage, nang-holdup

CEBU, Philippines - Gipasakaan na og kaso ang usa ka tawo nga nisuway unta sa pagtulis ug pag-hostage sa 18-anyos nga babaye sa dalan M.C. Briones, eskina Maguikay, Dakbayan sa Mandaue sa niagi’ng gabii.

Ang suspek giila nga si Anecito Laraño, hingkod, minyo nga  taga Cabaasan, Sambagon, Lungsod sa Pinamungajan.

Si Laraño gikasakay sa jeep sa biktima nga Geah Mea Canillas, taga Ibabao-Estancia, Dakbayan sa Mandaue kuyog sa iyaan nga si Guillerma Canillas gikan sa Dakbayan sa Danao.

Dihang nahidangat na sila sa Dakbayan sa Mandaue maoy gihimo sa suspek ang pagkapyot sa giluwanan nga jeep.

Sa pagkanaug sa biktima ug sa iyaan, kalit lang gigakos sa suspek ug gitionan ang liog og kutsilyo.

Naalarma ang mga tawo hangtud nahidangat ang mga polis ug nahitabo ang pag-inilogay sa kutsilyo hinungdan nga naluwas ang biktima apan nasamdan si PO2 Maximiano Moniva Jr., nadestino sa traffic division sa Mandaue City Police Office.

Kasong robbery with intimidation against person ang gipasaka batok ni Laraño.

Tun-an usab ang pagpasaka og kasong direct assault human usa ka polis ang nasamdam sa kamot sa kutsilyo nga gition ngadto sa biktima.

Ang suspek sa iyang bahin daw sa wala sa iya maayong panimuot ug kini nagkanayon nga wala siya nakainom o nakasuyop atol sa insidente apan ang tumong lang niya nga makauli sa Pinamungajan tungod kay giingong daghang naggukod niya nga mga tawo nga wala niya mailhi.  (BANAT NEWS)