Cebu City andam mag-host sa ASEAN Summit

CEBU, Philippines - Human sa malampusong kasaulogan sa 51st International Eucharistic Congress (IEC), andam na ang Dakbayan sa Sugbo kun dinhi ipahigayon ang Association of Southeast Asian Nation (ASEAN) Summit sunod tuig.

Ang ASEAN Summit, usa ka tinuig nga panagtigom sa mga nasud sa Southeast Asia nga nagtambayayong sa kalambuan sa ekonomiya.

“I think we are ready. Nag-agi naman ta og APEC. Nag-agi naman ta og IEC,” matud sa chairman sa Police Coordinating Advisory Council (PCAC), Eugene Elizalde.

Atol sa PCAC meeting kagahapon, si Elizalde nipadayag sa iyang pasalamat ngadto sa tanang kapolisan nga niabag atol sa katapusang adlaw sa 51st IEC niadtong niaging Domingo tungod sa hapsay ug kamalinawon sa kalihokan.

Matud ni Elizalde, wala kaayo nakasinati og ka-traffic ang SRP paghuman sa misa apan didto sa gagmay’ng dalan sama sa N. Bacalso ug Pardo nagpunsisok ang mga sakyanan hinungdan sa kahuot sa dagan sa trapiko.

Si suspended Mayor Mike Rama usa sa mga nalangay ug wala nakatambong sa iyang lakaw.

 Dugang niya, kini mao ang angayan nga tan-awon ug pangandaman bisan wala pay kasigurohan nga dinhi sa Sugbo himuon ang ASEAN Summit. (BANAT NEWS)