Lima ka oras nga prosisyon sa IEC

CEBU, Philippines - Nilanat og usa ka oras ang gipahigayon nga walk through dry run sa himuon prosisyon kalabot sa 51st International Eucharistic Congress karong Enero 29 nga may gilay-ong tulo ka kilometro nga manukad sa Cebu Provincial Capitol ngadto na sa Plaza Independencia gikan alas singko y medya sa hapon.

Ang mga sakop sa Procession Committee nga gipangulohan ni Msgr. Marnel Mejia, mga sakop sa Covenanted Communities, representante sa mga parokya, Communicator, kapulisan ug Cebu City Transportation Office.

Matud pa ni Msgr. Mejia, sa kinatibuk-an ilang napanglantawan nga mokabat  upat ngadto sa lima ka oras ang maong kalihukan.

Ang ground commander sa kapulisan nga si Chief Inspector Ryan Devaras, sa Mobile Patrol Group nitug-an nga mil kwatro sintos ka mga polis ang ilang ipakatap atol sa prosisyon.

Si Senior Superintendent Rey Lyndon Lawas pangu sa Security Task Group sa 51st IEC mihulagway nga "whole-nation approach" ang ilang ipatumang seguridad.

Giawhag niya ang publiko nga manginlabot sa seguridad sa maong kalihukan pinaagi sa pagsumbong dayon kanila kun aduna silay mabantayan nga kadudahan. Sa dili pa pormal nga buksan ang 51st International Eucharistic Congress (IEC) karong Enero 24 usa ka pamahaw ug paniudto ang idalit alang sa usa ka libo ka mga kabus ug libud-suroy sa Enero 23.

Sila gikan sa nagkalain-laing pamilya dinhi sa dakbayan ang pakan-on sa Solidarity Committee sa IEC.

Nagkanayon si Fr. Joseph Larida, IEC Security Committee sa Archdiocese of Cebu , 51 ka pamilya ang ilang gipanguha sa matag parokya sa Sugbo ug gilakip usab nila ang mga libud-suroy.

Ang maong kalihukan pangulohan ni Fr. Carmelo Diola, pangu sa Solidarity Committee ug kini mahitabo sa Pope John XXIII Seminary Gymnasium.

Tinguha sa simbahan nga bisan ang mga kabus wa isalikway sa simbahan. (BANAT NEWS)