Cyberporn gibantayan karong bakasyon

CEBU, Philippines – Si Bise Gobernador Agnes Magpale mipasidaan sa mga ginikanan nga unta dili magpatintal sa silaw sa kwarta unya ang ilang mga anak na maoy ilawog ngadto sa mga turista.

Hinuon dili tanang langyaw ang mohimo og mga kalapasan sa balaod o mangmolestiya og mga bata o mga babaye.

Apan mao kini ilang pasidaan karong Holiday Season tungod kay gilauman nga daghang mga langyaw nga turista ang mobakasyon nganhi sa nasud.

Matud ni Magpale nga daghan pang ginikanan ang wala pa makaamgo ug migamit sa ilang mga anak sa cyber pornography tungod kay alang kanila ang pagkuha o hulagway sa ilang mga anak nga hubo wala kini dautang epekto.

Ang maong mga ginikanan naghuna-huna lang kini sa sayon ug dali nga kwarta ug wala nila huna-hunaa nga maguba ang dignidad ug kaugmaon sa ilang mga anak.

Si Magpale kinsa co-chairman sa Provincial Council on the Welfare of Children (PCWC) nagkanayon nga ang kapolisan ug ubang miyembro sa council gipaubos kini karon sa mga bansay-bansay kabahin sa pag-detect sa cyber pornography ug pagpreserba sa mga ebidensiya.

Gipasabot niya nga mi-focus sila batok sa cyber pornography tungod kay lisud kini nga sikupon tungod kay ang mga ginikanan mao pa mismo ang monudnod sa ilang mga anak ug motago sa krimen.

Ang mga miyembro sa PCWC, kapolisan ug National Bureau of Investigation (NBI) higpit nga nagtuon kabahin sa mga bag-ong teknolohiya karon sama sa mga hi-tech nga cellphone nga mao nay gamiton sa cyber pornography.

Dugang ni Magpale nga dali na kaayo sila karon makapangayo og hold departure order sa mga langyaw nga nakahimo og kalapasan sa balaod tungod kay ang probinsiya ug ang Bureau of Immigration nagkasabot na niini. – /EIM) (BANAT NEWS)