SAR sa tulo ka batang missing gipahunong na
CEBU, Philippines - Gihunong na sa dakbayan sa Lapu-Lapu ang search and rescue operation sa tulo ka batang lalaki nga na-missing sa kadagatan sa Isla sa Olango sa miaging Oktubre 31 ug gihimo na lang kini search and retrieval operation sugod niadtong Nobiyembre 1.
Kini human nga wala gyud sila makit-i sud sa pipila ka semana nga pagpangita . Si Mayor Paz Radaza gikatakdang pakigkitaan ang pamilya sa mga bata.
"I want to meet them again and want to write a letter to them. At this time, lisud baya magpaabot. Mag-hope nga buhi pa sila," matud pa ni Radaza.
Kahinumduman nga misakay og gamay’ng bangka silang Aaron Hida, 15 anyos, Shawn Michael Daño, 9 anyos ug Jose Maria Eduardo Retullido, 15 anyos pulos residente sa sitio Kauswagan, barangay San Vicente sa nahisgutang isla sa miaging Oktubre 18 sa buntag.
Niadtong adlawa kusog sa hangin ug dagko ang bawod sa kadagatan dala sa bagyong Lando nga nisud sa Pilipinas ug wala na makabalik pa ang mga bata.
Ang pagkawala sa mga bata gikaguol sa mga ginikanan nga nangindahay nga bisan patay’ng lawas na lang unta ang mauli kanila aron mahatagan nila sila og desenteng lubong.
Midugang si Radaza nga ang City Social Welfare and Development nakig-coordinate sa mga ginikanan gawas sa gihatag nga pagkaon isip hinabang sa pamilya.
Sa pagkakaron, wala pay gihisgutan kung pila ang ihatag nga tabang-pinansyal kay gikinahanglan pa niyang maistorya ang pamilya sa biktima. (BANAT NEWS)
- Latest
