Wala mosugot nga himuong suyopanan iyang payag gipatay

CEBU, Philippines – Maayong pagkatabas sa ulo sa usa ka 65 anyos nga lolo ug halos naputol ang bukton niini sa dihang kini gitigbas sa wala mailhing tawo samtang natulog sa iyang payag-payag diha sa Upper V. Rama, barangay Guadalupe ning dakbayan sa Sugbo sa miaging kaadlawon.

Giila ang biktima nga si Condrado Zamora Jr., nagpuyo sa maong dapit.

Matud pa ni Senior Police Officer 2 Wetzel Berry, imbestigador sa Homicide Section sa Cebu City Police Office nga nahinabi sa Banat News  nga dakung samad sa ulo ug bukton ang biktima nga naangkon hinungdan sa iyang kamatayon.

Nagduda si Berry nga nakapanagang sa iyang bukton ang biktima apan wala na kini nakadagan pa gumikan sa pangidaron ug natigbasan kini sa iyang ulo.

Nasayran usab sa kapolisan nga adunay mga manuyopay nga kaniadto pa magsige og hangyo nga himuong suyopanan og shabu iyang payag apan gibaliran kini sa biktima ug giyawyawan ang mga adik. Nagtuo si Berry nga dako ang posibilidad nga mao kadto ang gikasuk-an sa mga manuyopay hinungdan nga ila kining gipatay.

Nakuha diha sa crime scene ang 21-pulgadas nga sundang nga bag-ohay pa lang nga gipalit kay duna pa kini “price tag” nga P290.

“Kanang info bahin sa manuyopay, kana atong gitan-aw nga lagmit motibo ani nga hitabo, kay wala man daw ni siya’y kontra sa area ingon sa iyang igsuon,” sumala pa ni Berry.

Ang mga residente nga nagpuyo sa palibot sa balay sa biktima ang nakadungog pa nga duna’y diyotay nga komosyon sa gipuy-an sa biktima apan wala  nila panumbalinga kay wala man motingog ang biktima ug lawom na kaayo ang kagabhion.

Gitug-an ni Berry nga adunay mga testigos nga ilang nakuha nakakita og tawo nga nagsige og bahas bahas sa gawas sa balay sa biktima pipila ka oras sa wala pa makaplaging patay ang biktima. – /EIM) (BANAT NEWS)