Usa patay, tulo angol sa pinusilay

CEBU, Philippines – Usa ang patay samtang tulo ang nalanding sa tambalanan sa duha ka managlahing insidente sa pinusilay sa dakbayan sa Sugbo kagahapon sa kaadlawon. Sa sitio Mahayahay, barangay Calamba patay ang usa ka armadong lalaki human kini mipabuto sa iyang pusil ngadto sa mga sakop sa Investigation and Detection Management Branch (IDMB) sa Cebu City Police Office nga miduol kaniya.

Ang maong lalaki naila nga si Samson Cinco, 32, nga taga sitio Kamalig, barangay Labangon sa dakbayan sa Sugbo.

Base sa imbestigasyon sa Homicide Section, ang mga kawani sa IDMB nagpatrolya sa maong barangay miduol kanila si Barangay Kagawad Eldie Ygonia ug mipahibawo nga adunay armadong lalaki nga nagbahis-bahis sa ilang dapit.

Daling giadto sa mga polis ang nahimutangan sa armadong lalaki nga nailhan diay nga si Cinco. Matud pa adunay usa ka amigo ni Cinco ang nasugatan sa mga polis ug misulti kanila nga paabuton niini ang mga polis diha sa iyang balay.

Apan sa pagsulod ni Police Officer 3 Jeffrey Bernal aron magpangutana bahin sa reklamong nagdaladala kini og armas  kalit lang niining gipusil si Bernal apan wala kini maigo.

Dihadiha mibawos og pabuto ang mga polis hinungdan sa pagkaigo niini sa nagkadaiyang bahin sa lawas ug daling gidala sa Cebu City Medical Center apan gideklarar na kini nga dead on arrival. Ang igsuon sa suspek nga si Benrix, mitug-an sa kapulisan nga ang nurse sa tambalan mi-turn-over sa iyaha og usa ka gamay nga container nga aduna’y sulod unom ka mga gagmay nga pakete sa shabu.

Nakuha usab gikan sa suspek ang usa ka kalibre 9mm nga adunay upat ka bala. Samtang human duha ka oras ang milabay, duha ka mga sibilyan ang naamong sa pagpinusilay sa tulo ka lalaki sa dalan sa sitio Itom Yuta, sa barangay Lorega sa dakbayan sa Sugbo.

Ang napagan mao sila si Gil Tejas, 52, ug si Merlina Daroy, 62, human nagpinusilay ang 18-anyos nga si Lawrence Joshua Rabor ug duha ka lalaki nga ang usa nailhan lang sa ngalan nga “Nice.” Si Tejas nagsakay sa  iyang motorsiklo ug nagsunod kang Rabor kinsa nagsakay usab og motor niadtong tungora dihang kalit nipaka ang butobuto sa armas. Matud pa nga si Rabor nakigpinusilay diay sa duha ka mga batan-on ug naigo kini sa tuong bahin sa iyang lawas, apan si Tejas naigo usab sa iyang wala nga paa.

Si Daroy kinsa nipalit og uling sa usa ka tindahan nakaangkon usab og samad pinusilan sa wala nga abaga.

Dali nga gidala sa Rabor sa Chong Hua Hospital samtang si Tejas ug si Daroy gidala usab sa Cebu City Medical Center.

Ang kapulisan sa Parian Police Station wala na makasakop sa mga suspek nga daling niikyas sa wala matinong direksyon. – /EIM) (BANAT NEWS)