Ginang gisud sa balay gilugos

CEBU, Philippines – Gilugos ang asawa sa drayber sa usa ka opisyal sa dakbayan sa Talisay diha sa giabangan nilang balay sa barangay Poblacion sa maong dakbayan kagahapon sa alas-2 sa kaadlawon.

Si Minerva (dili tinuod nga pangalan), 30 anyos ang kuyog sa duha niya ka anak nga nagpangidaron og 3 ug usa pa ka tuig, nangatulog niadtong tungora dihang nisulod ang rapist.

Ang Banat News di mohingalan sa biktima ug bisan sa opisyal sa siyudad nga agalon sa bana niini aron taguon ang pagkatawo sa pamilya.

Matud pa ni Police Officer 1 Paula Lumakang sa Women’s and Children Protection Desk sa Talisay City Police nga nisulod ang suspetsado sa panimalay samtang natulog ang biktima.

Wa makasyagit ang ginang tungod kay gisap-ungan dayon ang baba niini og panapton dayon kini gihiktan og wire sa charger sa cellphone ang iyang mga kamot ug tiil.

Matud ni Lumakang way nahimo ang biktima samtang siya giamong-amongan. Nisibat ang suspek nga gibiyaan ang biktima nga nakagapos pa.

Naningkamot ang biktima nga makabarog ug nag untol-untol pagawas sa ilang balay hangtod nga nahagba sa gawas ug nakita sa mga silingan ug gitabangan ug gidala sa presinto.

Apan naglisod kini pag-ila sa suspetsado tungod sa kangitngit niadtong higayuna apan ang bana niini aduna nay gidudahan nga adunay gusto sa iyang asawa.

"Silingan ra gyud ni namo kay kining tawhana mahibulong ko kay sige man siya og pangutana sa akong asawa. Nagduda na gyud ko nga ibog siya sa akong asawa," matud pa sa bana sa biktima sa Banat News.

Ang bana ang wa nakauli sa ilang balay nianang gabhiuna tungod kay nag-drive kini sa sakyanan sa agalong opisyal sa siyudad.  – /EIM) (BANAT NEWS)