Dakbayan sa Sugbo upaton ka distrito

CEBU, Philippines – Si Konsehal Gerardo “Gerry” Carillo nagplano nga kun modaog siya pagka kongresista atol sa eleksyon sunod tuig iyang isugyot nga buak-buakon ang dakbayan sa Sugbo ngadto sa upat ka distrito.

Si Carillo maoy kandidato sa Team Rama pagka kongresista diha sa south district kontra ni Kongresista Rodrigo “Bebot” Abellanosa nga alyado sa Bando Osmeña Pundok-Kauswagan (BOPK).

Pagka karon, ang dakbayan sa Sugbo gibahin sa duha lang ka distrito – ang north ug south district.

Matud ni Carillo nga ang Sugbo kaniadto adunay upat ka karaang lungsod nga mao ang Pardo, San Nicolas, Mabolo ug ang Ciudad. Kini maoy tinguha ni Carillo nga gusto niya nga himuong mga distrito.

Si Carillo miingon nga kun modaog siya pagka kongresista, kini maoy una niya nga isugyot nga balaudnon.  Pagka karon, dul-an na sa usa ka milyon ang mga lumulopyo sa dakbayan.

Nagtuo si Carillo nga kun mahimo na nga upat ka distrito ang dakbayan sa Sugbo mas daghan nga mehoras ang atong makuha gikan sa nasudnong kagamhanan.

Apan lahi ang panglantaw ni kanhi Kongresista Tomas R. Osmeña kinsa misaway sa laraw ni Carillo. Matud ni Osmeña nga ang sugyot ni Carillo nagpasabot og dugang gasto sa dakbayan.

Pagka karon nga duha lang ka distrito ang dakbayan sa Sugbo, ang siyudad sa Sugbo adunay 16 ka konsehal. Si Osmeña miingon nga kun upat na ka distrito ang dakbayan sa Sugbo, mahimo na usab nga 32 ang mga konsehal sa dakbayan ug nagpasabot kini og dugang gastohan.

Kini tungod kay ang siyudad sa Sugbo maghimo na man usab og bag-ong City Hall legislative building nga adto magpahimutang ang mga bag-o nga konsehal ug ang ilang mga kawani.

Naglibog si Osmeña kun ngano nga si Carillo dili man hinuon mohatag og pagtagad aron mapangitaan og sulbad ang problema sa ilegal nga drugas.

Apan si Mayor Michael Rama misuporta sa nahuna-hunaan ni Carillo nga iyang kaalyado sa politika. Matud ni Rama “Its good to have another district, because, with that, it can earn additional revenue to the city so that is something to be welcome.” (BANAT NEWS)