Nahulog sa tabay ug natagak sa dagat

CEBU, Philippines - Duha ka tawo nangalumos sa lainlaing lugar sa probinsya sa Sugbo kaniadtong Miyerkules, ang usa kanila nahulog sa atabay ug ang usa nahulog sa gisakyang panagatan.

Si Jeffrey Alolor, 38, mananagat, taga Sitio Punta, Barangay Sulangan, Bantayan napalgan nga patay na ilawom sa usa ka atabay.

Samtang ang lawas ni Dominador Pinote, 54, nga taga Barangay Mahawak, Medellin napalgang naglutaw sa dagat human kini nahulog sa iyang gisakyan nga panagatan.

Matud sa kapolisan nga gituohang hubog si Alolor mao nga natagak siya sa atabay. Sa wala pa siya makit-i nga patay, may nakakita nga hubog ang biktima ug natulog sa daplin sa atabay.

Pagkabuntag, adunay babaye nga magkawos unta og tubig ang nakurat kay didto man nagluko ilawom sa tabay ang lawas sa usa ka tawo.

Nagtuo ang kapolisan nga malagmit nga gumikan sa kahubog, naligid si Alolor gikan sa iyang gihigdaan ug nahulog sa tabay nga wala sa’y tabon.

Sa laing bahin, si Pinote nahulog sa gisakyan niya nga panagatan diha nga gihapak kini sa dako’ng bawod didto sa kadagatan sa Madridejos.

Milakaw si Pinote paingon sa likud nga bahin sa ilang bangka nga panagatan aron magkuha unta og ice apan nasarasay tungod sa kalit nga paghapak sa bawod. Paglabay sa mga adlaw, ang lawas ni Pinote napalgan na lang nga naglutaw na sa dagat nga patay na.  (BANAT NEWS)