Lolo buk-an unta sa iyang ulo

CEBU, Philippines – Deriyot mabuak ang ulo sa usa ka 60-anyos nga lolo human kini bunali og kahoy sa iyang hubog nga silingan didto sa Barangay Kanyuko, Dumanjug kaniadtong Sabado sa gabii.

Ang kapolisan miila sa biktima nga si Leonilo Alson, minyo ug nagpuyo sa maong barangay samtang ang suspetsado mao si Joshir Marko, 26, ulitawo, ug temporaryo nga nagpuyo sa maong dapit apan lumad nga taga Canlaon, Negros Oriental.

Matud ni PO3 Rafael Albero Jr., desk officer sa Dumanjug Police Station, nga samtang mopauli na unta ang tiguwang sa ilang balay gisundan kini sa suspetsado nga nagbitbit og usa ka pinutol nga kawayan ug gibunalan ang ulo sa biktima.

Ang mga silingan sa biktima nga nakabantay sa hitabo maoy mitabang sa biktima ug midala sa Barili District Hospital apan gibalhin kini sa Vicente Sotto Memorial Medical Center (VSMMC) tungod sa grabe nga bun-og.

Ang kapolisan abtik nga miresponde ug ilang nadakpan si Marko nga didto na sa pantalan sa Barangay Tangil sa maong lungsod nga nakasakay na og lansa paingon unta sa Negros.

Si Marko miangkon nga nakainom siya atol sa maong hitabo apan wala na mohatag og dugang pamahayag. Nagduda si PO3 Albero nga posible’ng duna na’y kanhi bikil ang duha ug kini subli lang nga naugkat sa diha nga nakainom ang suspetsado ug iyang nakit-an ang biktima.

Kaso’ng frustrated murder ang giandam sa kapolisan nga ipasaka batok sa suspetsado nga anaa karon sa karsel sa Dumanjug Police Station.  – /RUB) (BANAT NEWS)