Mga ‘Police scalawags’ nailhan na

CEBU, Philippines - Duna na’y mga pangalan ang City Intelligence Branch sa Cebu City Police Office sa mga polis nga gireklamo nga nalambigit sa mga ilegal nga kalihokan nga ania sa dakbayan sa Sugbo nadestino.

Kini ang gitug-an ni Superintendent Romeo Santander ang hepe sa CIB nga nahinabi sa mga tigbalita.

Matud pa ni Santander nga dili lang pagrelibo ang ilang tuyo kanila kondili  ang pagpasaka g’yud og kaso batok kanila diha sa hukmanan.

Ang maong lista sa mga badlongon nga polis naggikan ni Konsehal Dave Tumulak ang Chairman sa Peace and Order sa konseho dakbayan sa Sugbo nga ilang nakuha pinaagi sa text hotline gikan sa command center sa dakbayan.

Apil sa nadawat nga reklamo ang maong mga polis nga nalambit sa pagprotiher sa ilegal nga drugas, pagpanguha sa mga butang sa mga suspetsado nga ilang sikopon ug mga polis nga adis-adis.

Duna sa’y mga polis nga nalambigit sa “hulidap” nga kunohay manakop og drug pushers apan dili dad-on sa presinto o ilang buhatan kay ilaha lang ipasakay-sakay sa ilang sakyanan palibot sa siyudad samtang giareglo pinaagi sa kuwarta ang kaso aron dili nila dad-on sa presinto.

“Kinahanglan nga paspasan g’yud ni kay basin makabantay ni sila kay ang mga tawo ra ‘sab ang makaluluoy.

I warned them magsige gani sila ana moabot g’yud ang gaba nila,” matud pa ni Tumulak. Sumala pa ni Tumulak nga ang mga nalambigit nga mga polis duna’y ranggo gikan sa Police Officer 1 hangtod sa Senior Police Officer 3.

“Ato gyod ning tutukan pag-ayo sa city government kay this is a serious allegation and dili ta mo-tolerate og duna’y ingon ini.

Dili lang relieve, dakpon, prisohon g’yud, aron makita, aron wala na’y mosunod, it’s a lesson for them,” pasabot pa ni Tumulak. Si Santander mihagit sa katawhan nga motug-an kun kinsa pa nga mga polis ang ilang nahibaw-an nga nalambigit sa ilegal nga kalihokan. (BANAT NEWS)