Tanod gihapsa’g botelya patay
CEBU, Philippines - Nagupok sa agtang sa usa ka barangay tanod ang botelya sa softdrinks human gibunalan samtang kini padung molabang sa sapa sa Barangay Madridejos lungsod sa Alegria.
Ang namatay naila nga si Eutique Devila, 55, aktibo nga tanod sa maong lugar samtang ang suspek naila nga si Edward Lendio, 36, nga iyang silingan.
Si Police Officer 1 Carmelito Dacula, desk officer sa Alegria Police Station, nga nahinabi sa Banat News miingon nga nadunggan ang biktima nga misiyagit pagpangayo og tabang.
Usa ka Rosemary Jacobe ang nakadungog kaniya ug daling nanawag sa mga silingan.
Dihang ila nang gisusi ang gigikanan sa maong siyagit nakita nila nga nagligdas na sa sapa ang patay nga lawas sa biktima. Sumala pa ni PO2 Dacula nga napulpog sa agtang sa biktima ang botelya sa softdrinks nga maoy gigamit sa suspek sa krimen.
Pipila ka oras human sa hitabo mitahan sa iyang kaugalinon si Lendio ug miangkon sa krimen, mipasangil siya nga nagkatinubagay silang duha sa biktima diha sa sapa bahin sa ilang mga asawa.
Apan misangpot kini sa sinukmagay hangtud niabot sa punto nga iyang gihapsan og botelya ang tanod. Matud pa sa suspek sayo nianang adlawa nagkauban pa sila pagtagay og bino sa usa ka tindahan. (BANAT NEWS)
- Latest
