Daghang drugas nasakmit, unom dakpan

CEBU, Philippines - Dul-an sa P1 ka milyon nga kantidad sa shabu ang nasakmit sa kapolisan sa siyudad ug probinsya sa Sugbo niadto’ng Miyerkules nga misangpot usab sa pagkasikop sa unom ka tawo, ug usa ang nakasibat. Ang mga sakop sa Cebu City Police Intelligence Branch ug Criminal Investigation and Detection Group-7 mihimo og joint operation sa Barangay Suba kaniadtong Miyerkules sa gabii nga miresulta sa pagkasikop sa tulo ka lalaki apan ang ilang target nga dakponon nga si Jollybe Inso nakaipsot.

Armado ang kapolisan og search warrant nga gi-isyu ni RTC Branch 18 Judge Gilbert Moises. Si CIB chief Romeo Santander miingon nga tulo ka semana ang ilang pagpaniid sa kalihukan ni Inso pagpamaligya og drugas.

Nakasibat si Inso agi sa sekreto’ng pultahan sa iyang balay. Ang duha niya ka kauban nga sila si Kevin Inso ug Allan Alce nadakpan ug si Kevin nakuhaan og 26 ka gagmay nga pakete sa shabu ug 20 ka pakete’ng shabu nakuha usab gikan ni Alce.

Ang ikatulo nga dinakpan si Marcial Inso nakuhaan og usa ka .45 kalibre nga pistola.

Sa pagsiksik sa mga polis sa balay ni Jollybe Inso napalgan nila ang 13 pa ka medium size nga pakete sa shabu, 91 ka gagmay nga pakete nga duna gihapo’y sulod nga shabu nga gibana-bana nga mokantidad og kapin sa P700 mil.

Gawas sa mga drugas, gisakmit usab sa kapolisan ang kuwarta nga P10,900 ingon man ang timbangan sa drugas ug drug paraphernalia. Si Jollybe Inso matud pa makabaligya og 200 gramos hangtud usa ka kilo nga shabu matag semana.

Nadakpan usab sa kapolisan ang duha ka suspetsado’ng drug pusher sa buy-bust operations sa Sitio Mahayahay, Calamba kaniadto’ng Miyerkules sa gabii. Ang nadakpan mao sila si Peter Arroyo, 21, nga nakuhaan og 65 ka gagmay’ng pakete sa shabu ug John Michael Pepito, 18, nga nakuhaan usab og pito ka gagmay nga pakete sa ilegal nga drugas. Ang tanan gibana-bana nga kantidad og P21,900.

Sa laing bahin nasikop ‘sab sa kapolisan didto sa Balamban ang usa ka lalaki nga duna’y pending kaso nga direct assault ug nakuhaan pa og daghang drugas ug granada didto sa Sitio Lacdon sakop sa Barangay Cambuhawe.

Ang dinakpan mao si Godofredo Estoce, 46, nga nagpuyo sa Barangay Cambuhawe.

Gialarma si Estoce ngadto sa kapolisan kay nasigpatan nga armado ug nagbarug-barog atbang sa usa ka tindahan. Mga shabu nga kantidad og P110 mil ug granada ang nakuha sa mga polis gikan ni Estoce. (BANAT NEWS)