Duha ka tulisan nadakpan
CEBU, Philippines - Walay swerte ang usa ka tulisan ug usa ka esnatser nga namiktima og mga pasahero sa jeep pasaheroan sa duha ka managlahing hitabo sa dakbayan sa Sugbo human nga nataymingan sa mga polis.
Nadakpan sa usa ka off-duty nga sakop sa Special Weapons and Tactics (SWAT) sa Cebu City Police Office nga si Police Officer 3 Arvin Guiroy kinsa nakasibilyan ug nagdala sa iyang 8-anyos nga anak maoy migukod ug misikop sa esnatser nga si Roderick Caballes, 27.
Gilabnihan sa suspek og cellphone ang usa ka pasaherong menor de edad diha sa Sambag 2 apan nataymingan nga milabay sa maong lugar si PO3 Guiroy ug daling migukod sa suspek.
Nabawi kaniya ang cellphone sa biktima ug nakuhaan kini og kutsilyo.
Samtang usa ‘sab ka tulisan ang nasikop sulod sa jeep sa bagitong polis nga si Police Officer 1 Erwin Barabad diha sa General Maxilom Avenue, Santa Cruz, Cebu City.
Ang nasikop naila nga si Danilo Felicitas, 29, nagpuyo sa barangay Calamba kinsa mitulis sa mga pasahero sa jeep pasaheroan, apan nagbantay si Barabad sa dapit ug daling miresponde hinungdan sa pagkasikop kaniya.
Nakuha kang Felicitas ang usa ka kutsilyo ug ang gisuksok nga usa ka paketeng shabu. (BANAT NEWS)
- Latest
