San Pedro Calungsod 2 ka tuig na
CEBU, Philippines – Gisaulog kagahapong adlawa ang ikaduha ka tuig nga kasumaran sa pagka-Santos ni San Pedro Calungsod, ang batan-ong Sugbuanong katekista.
Usa ka Santos nga Misa ang gipahigayun sa San Pedro Calungsod Chapel nga nahimutang sa South Road Properties atbang mismo sa dapit diin gipahigayun ang thanksgiving mass nga gitambungan sa liboan ka tawo duha ka tuig na ang milabay.
Si Cebu Archbishop Jose Palma ang nangulo sa Santos nga Misa nga gitambungan sa 70 ka kaparian gikan sa lain-laing parokya ug mga silingang dapit sa Sugbo sama sa Bohol.
Lakip ang mga masakiton nga nagdeboto kang Calungsod ang nanambong. Samtang nagpasalamat si Palma sa tanan nga nitabang sa proseso sa pagka-Santos ni Calungsod, iyang gipadayag nga ang mga Sugbuanon gigasahan gyud og santos ug usa sa garbo sa mga Sugbuanon mao ang pagtuo nga angayang ipaambit.
Gilakbitan usab ni Palma ang mga katalagman nga nahitabo sa milabay’ng tuig nga ang pagtuo ang nakapabangon ug bisan ang mga linog ug bagyo dili makatumpag sa pagtuo. Gipahinumdum ni Palma nga ang pagpakabuhi dili sayon, dili usa ka joyride kun dili ang kinabuhi usa ka panaw.
Matud ni Palma nga didto sa Roma, popular kaayo si San Pedro Calungsod gumikan sa mga hiyas nga naangkon niini ug sa pagkabatan-on pa nga nahimong santos.
Sa pagkakaron nagpadayun ang duaw nasud sa imahen ni San Pedro Calungsod bisan pa kun duha na ka tuig sukad sa canonization niini ug padayong milambo ang mga mideboto. – /GMR) (BANAT NEWS)
- Latest
