Polis aksidenteng nakapusil sa manghOd

CEBU, Philippines - Boluntaryong nitahan sa kapolisan ang usa ka polis human kini aksidente nga nakapusil sa iyang manghod sa Vasquez Compound, Espina Village, Guadalupe, dakbayan sa Sugbo kagahapon sa alas 9:57 sa buntag.

Kritikal ang kondisyon ni John Rey Celestial kinsa naigo sa wala nga bahin sa iyang baba ug gikatahong milapos ang bala dapit sa liog human aksidente nga napusilan sa iyang maguwang nga polis nga si PO1 Lemuel Celestial nga nadestino sa Lapu-Lapu City Police Office isip Tourist Police.

Matud ni SPO1 Ruth Violango sa homicide section sa Cebu City Police Office nga nahitabo nga napusilan ang manghod sa polis dihang misulay kini og ilog sa iyang armas human nagkaaway ang  duha.

Sumala pa ni Violango nga human gipangutana sa polis ang iyang manghud labot sa paggamit og ilegal nga drugas, kalit lang nangilog sa iyang dala nga armas.

Duda ang kapolisan nga sanglit malupig ang polis sa kusog kay mas daku ang manghod, gipabuto niini ang armas apan didto naigo sa kilid sa baba sa biktima.

Ang polis ang dali sab nga midala sa iyang manghod sa tambalanan.

Si PO3 Alberto Diamante sa Mobile Patrol Group nga miresponde sa alarma miingon nga kalmado nga misurender kanila ang polis.

Gisuwayan pa unta og pagpangutana sa mga tigbalita ang maong polis apan nagdumili na kini og tubag ug igo lang miingon nga dugay na nga tig-gamitan ug drugas ang iyang igsuon.

Gihulagway sa mga polis si Celestial nga usa ka tarung ug buotan nga pagkapolis.

Gitanggong na sa CCPO detention cell ang polis ug kung wala’y kausaban, pasakaan kini og kasong frustrated homicide. (BANAT NEWS)